Avstriyada dəmir yolu qəzası nəticəsində 15 nəfər xəsarət alıb
Vyana, 9 iyul, AZƏRTAC
İyulun 9-da səhər saatlarında Avstriyanın Zaltsburq federal əyalətinin Lunqau regionunda dəmir yolu qəzası baş verib.
AZƏRTAC xəbər verir ki, Mur çayı boyunca regionlararası marşrut üzrə hərəkətdə olan qatarın vaqonlarından biri relsdən çıxaraq çaya düşüb. Əraziyə cəlb edilmiş xilasedicilərin məlumatına əsasən, 15 nəfər hadisə nəticəsində xəsarət alıb, onlardan dörd nəfər yaxınlıqdakı xəstəxanalara yerləşdirilib.
Qəzanın səbəbləri hələ tam aydınlaşmayıb. İlkin məlumata görə, iyulun 8-də ərazidə baş vermiş güclü yağıntı və sel ağac kötüklərini dəmir yolu xəttinin keçdiyi əraziyə gətirib. Səhər saatlarında içərisində əsasən məktəblilərin olduğu qatar həmin ərazidən keçərkən qəzaya uğrayıb.
Xilasedicilər sərnişinlər arasında itkin düşənlərin olub-olmamasını dəqiq müəyyənləşdirmək məqsədilə Mur çayında axtarışları davam etdirirlər.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
