Avtobus dayanacaqlarını zəbt edən sürücülərə xəbərdarlıq edilib
Bakı, 9 iyul, AZƏRTAC
Dəfələrlə olunan xəbərdarlıqlara və intizam tədbirlərinə baxmayaraq, hələ də avtobus dayanacaqlarında nəqliyyat vasitələrini saxlayan sürücülərə rast gəlinir. Nəzərə alınmalıdır ki, belə halda ümumi istifadədə olan nəqliyyat vasitələri, yəni avtobuslar yolun hərəkət zolağında dayanmalı olur. Bu da sərnişinlərin və piyadaların həyatı üçün ciddi təhlükə yaradır.
AZƏRTAC xəbər verir ki, bu barədə Daxili İşlər Nazirliyinin mətbuat xidmətinin yaydığı xəbərdarlıqda bildirilib.
Qeyd edilib ki, 5.12, yəni “Avtobusun dayanacaq yeri” nişanının tələbini pozan digər hərəkət iştirakçıları polis əməkdaşları tərəfindən vizual olaraq və ya xüsusi texniki vasitələrlə aşkarlandığı təqdirdə, barələrində inzibati xəta protokolu tərtib edilir.
“Sürücülər onu da bilməlidirlər ki, dayanacaqlarda avtobusların normal hərəkətini, sərnişinlərin rahat minib-düşməsini təmin etmək məqsədi ilə qeyd olunan nişanın qoyulduğu yerdən hər iki tərəfə 15 metrdən az olmamaqla yaxınlıqda digər nəqliyyat vasitələrinin dayanması və durması da qadağandır. Yaşayış məntəqələrində sürücülər dayanacaqdan hərəkətə başlayan avtobuslara yol verməli, avtobus sürücüləri isə yalnız onlara yol verildiyinə əmin olduqdan sonra hərəkətə başlamalıdırlar”, - deyə xəbərdarlıqda vurğulanıb.
Bölmənin digər xəbərləri
