“Axios”: Regional vasitəçilər ABŞ-İran gərginliyini azaltmağa çalışır
Bakı, 10 iyul, AZƏRTAC
“Axios”un məlumatına görə, regional vasitəçilər ABŞ ilə İran arasında artan gərginliyi azaltmağa çalışır və nüvə sazişi üzrə daha intensiv danışıqların aparılmasını təklif edir.
AZƏRTAC “Axios” nəşrinin məlumatına istinadla xəbər verir ki, ikisi vasitəçi ölkələrdən, digəri isə ABŞ rəsmisindən ibarət olan mənbələrə görə, regional hökumətlər iki ölkə arasında artan gərginliyi azaltmağa çalışır. Vasitəçi ölkələrdən birinin nümayəndəsi bildirib ki, Hörmüz boğazında İranın son hücumları Tehran rejimi daxilində ABŞ ilə İran arasında anlaşma memorandumuna qarşı olan və onu pozmağa çalışan elementlər tərəfindən həyata keçirilib.
Mənbələr Qətər, Pakistan, Misir və Səudiyyə Ərəbistanından olan rəsmilərin gərginliyi azaltmaq üçün ABŞ və İran rəsmiləri ilə çoxsaylı telefon danışıqları apardıqlarını bildiriblər.
Vasitəçilikdə iştirak edən regional mənbə bildirib: “Hər iki tərəflə gərginliyin azaldılması barədə razılığa gəlmək və sonra texniki qruplar arasında danışıqların növbəti mərhələsi üçün tarix təyin etmək üçün geniş diplomatik səylər göstərilir”.
İran və ABŞ son iki gündə Hörmüz boğazında üç ticarət gəmisinə hücumlarından sonra yaranan gərginlik fonunda qarşılıqlı zərbələr endirib.
Tehran ABŞ-nin hücumlarına cavab olaraq, cümə axşamı günü Amerikanın Bəhreyn, Küveyt, Qətər və İordaniyadakı hərbi infrastrukturuna bir sıra hücumlar həyata keçirib.
Bölmənin digər xəbərləri
