Aygün Attar: Qərbi Azərbaycan həqiqətlərinin təbliği TADİV-in prioritet istiqamətlərindən biridir
Ankara, 22 aprel, AZƏRTAC
Tarixi ədalətin bərpası səylərinə töhfə vermək, o cümlədən Qərbi Azərbaycan həqiqətlərinin təbliği Türkiyə-Azərbaycan Dostluq, Əməkdaşlıq və Həmrəylik Fondunun (TADİV) prioritet istiqamətlərindən biridir.
Bu barədə AZƏRTAC -a TADİV-in rəhbəri, professor Aygün Attar müsahibəsində deyib.
O xatırladıb ki, TADİV-in yaradılması ideyası Ümummilli Lider Heydər Əliyevə məxsusdur, o, iki qardaş xalqın bir-birinə daha da yaxınlaşmasının, mədəni dəyərlərin ortaqlığının, Azərbaycan xalqının tarixi və həqiqətlərinin türk və dünya ictimaiyyətinə çatdırılmasının vacibliyini vurğulayıb.
Onun sözlərinə görə, uzun illər fəaliyyəti ərzində TADİV öz səylərini təkcə Azərbaycanın işğal olunmuş torpaqlarının azad edilməsi və bərpasına verdiyi töhfələrə deyil, həm də Zəngəzur və bütövlükdə Qərbi Azərbaycan mövzularına yönəldib.
“TADİV xətti ilə Türkiyə və Qərb alim və ekspertlərinin iştirakı ilə çoxsaylı tədbirlər təşkil edilib: “Qərbi Azərbaycan həqiqətlərinin sosial şəbəkələrdə fəal təbliğatı davam etdirilir”, - deyə A.Attar qeyd edib.
Fondun rəhbəri bəhs edib ki, TADİV-in təşəbbüsü ilə ayrı-ayrı illərdə bir sıra ölkələrin, o cümlədən Fransanın diplomatik nümayəndəliklərinin binaları önündə Qarabağla bağlı tarixi ədalətin bərpası tələbi ilə aksiyalar keçirilib. “Biz diplomatik nümayəndəlikləri təkcə Azərbaycan torpaqlarının işğalının nəticələri barədə deyil, həm də Qərbi Azərbaycanın yerli əhalisinin deportasiyası barədə məlumatlandırmışıq”, - deyən A.Attar qarşıya qoyulan məqsədlərə çatmaqda “ictimai diplomatiya” alətlərinin səmərəliliyini vurğulayıb.
O, müasir Ermənistan ərazisində öz tarixi torpaqlarından qovulmuş azərbaycanlıların hüquqlarının bərpasına təkcə təşkilatların deyil, ayrı-ayrı ekspertlərin və alimlərin də töhfə verəcəyinə əminliyini ifadə edib.
A.Attar hələ 2003-cü ilin avqustunda Türkiyənin “Hərbi Tarix Araşdırmaları” (Askeri Tarih Araştırmaları) jurnalında dərc olunmuş “Zəngəzur necə ermənilərin əlinə keçdi?” başlıqlı məqaləsini misal göstərib. “Bu mövzuda məqalələr Türkiyədə daha sonra da dərc olunub, xüsusən 2018-ci ildə “Azərbaycan Türklərinin Ermənistandan məcburi köçürülməsi” adlı məqalə nəşr olundu. “Eyni məsələ Türk Tarix Qurumunun nəşrlərində də geniş işıqlandırılıb”, - deyə TADİV rəhbəri davam edib.
O, Qərbi Azərbaycan mövzusunda tədbirlərdən də danışıb. “2023-cü ilin dekabrında Türkiyə Prezident Administrasiyası Kompleksinin Milli Kitabxanasında TADİV xətti ilə Qərbi Azərbaycan mövzusunun səsləndirildiyi böyük tədbir təşkil olunub: “Müzakirələr zamanı tanınmış alimlər, aparıcı universitetlərin nümayəndələri ilə yanaşı, tanınmış strateji araşdırma mərkəzlərinin rəhbərləri, o cümlədən Azərbaycan və Türkiyə ombudsmanları da iştirak ediblər”, - deyə Fondun rəhbəri bəhs edib.
Onun sözlərinə görə, Türkiyə Böyük Millət Məclisinin Ailə, Qadın, Uşaq və Gənclər Komitəsi tədbirə fəal dəstək verib. “Bu, çox mühüm faktdır, çünki deportasiya və məcburi köçürmə dövrlərində ən həssas kateqoriyalar qadınlar və uşaqlardır”, - deyə A.Attar bildirib.
2024-cü ilin may ayında TADİV və Qazi Universiteti Rektorluğunun təşəbbüsü ilə Ankarada Qərbi Azərbaycandan deportasiya mövzusunda beynəlxalq elmi simpozium keçirilib. Müzakirələrdə Milli Məclisin deputatlarının, Türkiyənin müxtəlif universitetlərindən müəllimlərin, Harvard Kennedi Məktəbinin ekspertlərinin iştirak etdiklərini deyən Fondun rəhbəri qeyd edib ki, simpozium çərçivəsində edilən bütün çıxışları bu il türk və ingilis dillərində ayrıca kitablar şəklində nəşr etmək planlaşdırılır.
Bundan əlavə, TADİV Qərbi Azərbaycan mövzusunda televiziya proqramlarının hazırlanmasına, eləcə də Türkiyənin aparıcı media orqanlarında, o cümlədən Anadolu Agentliyi xətti ilə xəbərlərin hazırlanmasına öz töhfəsini verib.
“Düşünülür ki, TADİV-in fəaliyyəti Türkiyə ictimaiyyətinin Qərbi Azərbaycanın tarixi haqqında məlumatlandırılması üçün zəmin yaratmağa imkan verib. Bu gün biz Qərbi Azərbaycan İcmasının fəaliyyətini yaxından izləyir və alqışlayırıq. Biz bu istiqamətdə bundan sonra da öz töhfəmizi verməyə davam etməyə hazırıq”, - deyə o əmin edib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
