Bakı, 2 oktyabr, AZƏRTAC

İşğaldan azad edilmiş torpaqlardakı resursların iqtisadiyyatımıza inteqrasiyası Azərbaycan iqtisadiyyatı, habelə xarici investisiyanın cəlbi üçün yeni inkişaf perspektivləri açır.

AZƏRTAC xəbər verir ki, bu fikir Sumqayıt Dövlət Universiteti Dünya iqtisadiyyatı və marketinq kafedrasının professoru, iqtisad elmləri doktoru Şəfa Əliyevin “İşğaldan azad edilmiş torpaqlarımızdakı resursların iqtisadiyyatımıza inteqrasiyasının strateji əhəmiyyəti” sərlövhəli məqaləsində yer alıb.

Məqalədə qeyd olunur ki, bütövlükdə azad edilmiş bölgələrin iqtisadi resursları, kənd təsərrüfatı, turizm potensialı çox böyükdür. Bundan səmərəli yararlanmaq üçün ilkin olaraq müvafiq infrastrukturun yaradılmasının vacibliyini qeyd edən müəllif Azərbaycan dövlətinin həmin istiqamətdə kompleks tədbirlər planı əsasında hazırlıq işlərini artıq başa çatdırdığını və bu istiqamətdə fəaliyyətin intensiv olaraq davam etdirildiyini vurğulayıb. Bildirib ki, yaradılan infrastruktur təkcə Şərqi Zəngəzur iqtisadi rayonu üçün deyil, Azərbaycan, Zəngəzur dəhlizinin fəaliyyətindən sonra bütün region ölkələrinin inkişafında əsas amilə çevriləcək.

Şərqi Zəngəzur iqtisadi rayonunda əlvan metallurgiyanın inkişafı üçün mövcud olan yüksək potensial barədə danışan mütəxəssis ərazidə qızıl, civə, xromit, mərmər, perlit, üzlük tikinti daşları, koral və digər faydalı qazıntı ehtiyatlarının çoxşaxəli iqtisadiyyatımızın dirçəlişində oynayacağı rola xüsusi diqqət çəkib. Deyib ki, rayonun coğrafi mövqeyi və tarixi abidələri turizm baxımından əhəmiyyətlidir və bu sahədə böyük perspektivlər var. Minkənd, Tutqunçay kimi mineral bulaqlar, rayonun iqlim-balneoloji şəraiti və dağ meşələri kurort-rekreasiya üçün ideal imkanlar yaradır. Gəncəsər, Ağoğlan monastırları, Gürcülü, Məmmədbəyli türbələri, Xudafərin körpüsü və digər tarixi abidələr turistlər üçün cəlbedici məkanlardır.

Şəfa Əliyev işğaldan azad edilmiş ərazilərimizdəki hidroresursların ölkəmizin həyatında oynaya biləcəyi roldan danışaraq qənaətini Prezident İlham Əliyevin bu sözləri ilə əsaslandırır: “Uzunluğu 100 kilometrdən çox olan Həkəri çayının mənbəyi Laçın rayonundadır. Bu, böyük strateji əhəmiyyətə malik olan məsələdir. Deyə bilərəm ki, bizim 10-dan çox böyük və kiçik çayımızın mənbəyi işğaldan azad edilmiş torpaqlardadır. Onların arasında 4 çayı xüsusilə qeyd etmək istərdim. Çünki bu çayların uzunluğu 100 kilometrdən çoxdur. Tərtərçay 200 kilometr, Bazarçay 180 kilometrə yaxın, Xaçınçay 120 kilometrə yaxın - bu 3 çay Kəlbəcər rayonunda yerləşir. İşğaldan azad edilmiş torpaqların və orada həyatın bərpası üçün əlbəttə ki, çay resurslarımızın böyük əhəmiyyəti olacaqdır”.

“İşğaldan azad olunmuş ərazilərdə iqtisadiyyatın bərpasından sonra məhsul istehsalı 8 dəfə artacaq”, - deyən iqtisad elmləri doktoru əminliklə bildirir ki, Ağdam regionun həm sənaye, həm də elm mərkəzinə çevriləcək. Füzuli Beynəlxalq Hava Limanının istismara verilməsi regionun nəqliyyat və logistika imkanlarını dəfələrlə artırıb. Belə beynəlxalq aeroportlar Zəngilan və Laçın rayonlarında da istismara veriləcək. Bundan əlavə, Zəngəzur nəqliyyat və logistika dəhlizinin açılması nəinki ölkəmizin, eyni zamanda, region ölkələrinin iqtisadiyyatının fəallığına səbəb olacaq. Qubadlı, Laçın və Kəlbəcər rayonlarında heyvandarlığın inkişafı üçün əlverişli potensial var.

İqtisadçı alim hesab edir ki, işğaldan azad edilmiş ərazilərdə qızıl yataqlarının istismarı yaxın illərdə Azərbaycan iqtisadiyyatına böyük töhfə verəcək. Bərpa prosesində innovativ texnologiyaların tətbiqi diqqət mərkəzində olacaq və artıq bu proseslər başlayıb. Bundan əlavə, dağ-mədən sənayesinin, həmçinin tikinti materialları istehsalı sahələrinin, toxuculuq sənayesinin inkişaf etdirilməsi üçün müsbət impulslar diqqət çəkir.

Azad edilmiş torpaqlardakı resursların milli iqtisadiyyata inteqrasiyasının iqtisadi strukturun təkmilləşdirilməsində və onun neftdən asılılığının azaldılmasında əsaslı rol oynayacağını deyən professor bildirib ki, azad edilmiş ərazilərdə müasir və “ağıllı” texnologiyaların tətbiqi rəqabətqabiliyyətli milli iqtisadiyyatda dinamik inkişafa təkan verəcək, ilkin mərhələdə milli iqtisadiyyatımızın 6-7 faiz, inteqrasiya proseslərinin əsas fazası başa çatdıqdan sonra isə 10-11 faiz böyüməsinə səbəb olacaq.