Azərbaycan-Almaniya münasibətlərində ikitərəfli və strateji əhəmiyyətli mərhələ başlanır ŞƏRH
Bakı, 23 iyul, AZƏRTAC
Prezident İlham Əliyevin Almaniyaya rəsmi səfəri iki ölkə arasında münasibətlərdə yeni, ikitərəfli və strateji əhəmiyyətli bir mərhələnin başlanğıcı kimi qiymətləndirilməlidir. Səfər çərçivəsində qəbul edilən Birgə Bəyannamə siyasi dialoqun gücləndirilməsi və strateji əməkdaşlığın dərinləşdirilməsində mühüm yol xəritəsi rolunu oynayır. Bu sənəd tərəflər arasında həm uzunmüddətli perspektivləri müəyyənləşdirir, həm də siyasi dialoqun daha da genişlənməsi üçün möhkəm əsas yaradır.
Bu fikirləri AZƏRTAC-a açıqlamasında Sosial Strateji Tədqiqatlar və Analitik Araşdırmalar Mərkəzinin rəhbəri İlqar Hüseynli deyib.
O bildirib ki, enerji sahəsində əldə olunan razılaşmalar Azərbaycanın Avropanın enerji təhlükəsizliyində əsas tərəfdaş mövqeyini bir daha təsdiqləyir. Cənub Qaz Dəhlizinin strateji əhəmiyyəti xüsusilə ön plana çıxır. Almaniya şirkətləri ilə bağlanmış 10 illik müqavilə əsasında 1,5 milyarddan 2 milyard kubmetrədək qazın nəqli nəzərdə tutulur ki, bu da Azərbaycanın etibarlı enerji təchizatçısı statusunu daha da möhkəmləndirir.
“Azərbaycan-Almaniya Biznes Şurasının yaradılması iqtisadi münasibətlərin institusional əsasda inkişafına xidmət edəcək, işgüzar dairələr arasında əlaqələri genişləndirəcək. Bu əməkdaşlıq ölkənin ixrac potensialını və ümumi daxili məhsulunu (ÜDM) artırmağa əlavə imkanlar yaradacaq. Almaniyanın sənaye, texnologiya, eləcə də tibbi avadanlıqlar sahəsindəki qabaqcıl təcrübəsinin Azərbaycana cəlb olunması, xüsusilə Qarabağ və Şərqi Zəngəzurda tətbiqi regionun inkişafını dünya standartlarına çatdıracaq”, - deyə İ.Hüseynli əlavə edib.
Mərkəz rəhbəri, həmçinin Orta Dəhlizin və regional təhlükəsizlik məsələlərinin də önəminə toxunub: “Orta Dəhliz Avropa ilə Asiyanı birləşdirən ən etibarlı alternativ ticarət marşrutlarından biridir və Berlin üçün də strateji əhəmiyyət daşıyır. Bununla yanaşı, region ölkələrinin kənar təsirlərdən azad olaraq müasir, sivil tərəfdaşlıq modelinə keçməsi regional təhlükəsizlik baxımından vacibdir. Xüsusilə Ermənistanla sülh sazişinin 2025-ci ilin avqustunda ABŞ-də paraflanması və ardınca imzalanması gözlənilən mərhələyə qədəm qoyulması fonunda, Almaniya-Azərbaycan tərəfdaşlığı Cənubi Qafqazda davamlı sülh və sabitliyin təmin olunmasında həlledici rol oynayacaq”.
Yekunda İ.Hüseynli diqqətə çatdırıb ki, səfərin nəticələrinin beynəlxalq və dünya mətbuatında geniş işıqlandırılması Azərbaycanın geosiyasi məkanda artan rolunun, mövqeyinin və etibarlı tərəfdaş imicinin növbəti bariz sübutudur.
Bölmənin digər xəbərləri
