Vyana, 30 sentyabr, AZƏRTAC

Sentyabrın 29-da ATƏT-in Daimi Şurasının növbəti iclası keçirilib. Azərbaycanın ATƏT yanında daimi nümayəndəsi səfir Qalib İsrafilov iclasda çıxış edib.

AZƏRTAC xəbər verir ki, daimi nümayəndə çıxışında iştirakçı ölkələrin nümayəndələrini son günlər baş verən hadisələrlə bağlı ətraflı məlumatlandırıb. Daimi Şuranın diqqətini Ermənistanın cəbhə xətti boyunca Azərbaycana qarşı növbəti genişmiqyaslı hərbi təxribatına yönəldən səfir erməni silahlılarının ağır artilleriyadan istifadə etməklə Azərbaycanın mülki əhalisini, yaşayış məntəqələrini və mülki infrastrukturunu atəşə tutduğunu bildirib. Qeyd edilib ki, son erməni təxribatları zamanı indiyədək iki uşaq da daxil olmaqla azı 12 mülki şəxs öldürülüb, 35-dən artıq mülki şəxs ağır yaralanıb.

Vurğulanıb ki, 2016-cı ilin aprelində və 2020-ci ilin iyulunda olduğu kimi, Ermənistan ordusu bu ölkənin beynəlxalq öhdəliklərini, beynəlxalq hüququn əsas norma və prinsiplərini, o cümlədən beynəlxalq humanitar hüququ kobud şəkildə pozaraq mülki əhalini və infrastrukturu qəsdən hədəf alır. Hazırda Ermənistan ordusu Azərbaycanın cəbhə xəttinə yaxın ərazilərində əhalinin sıx yaşadığı yerləri artilleriya atəşinə tutur. Bunun nəticəsində azı 150 yaşayış binası dağıdılıb. Səfir bununla bağlı konkret faktların əks olunduğu məlumat vərəqinin üzv ölkələrin nümayəndəliklərinə təqdim olunduğunu da diqqətə çatdırıb.

Ermənistanın hərbi təcavüzünü dəf etmək və ölkəmizdə əhalinin sıx məskunlaşdığı yaşayış yerlərinin təhlükəsizliyini təmin etmək üçün Azərbaycan Silahlı Qüvvələrinin özünümüdafiə hüququndan istifadə etdiyini, beynəlxalq humanitar hüquqa tam uyğun olaraq əks-hücum tədbirləri gördüyü vurğulanıb. Səfir deyib ki, Azərbaycan öz suveren torpağında hərəkət edir, suverenliyinə, ərazi bütövlüyünə və mülki əhalisinin təhlükəsizliyinə qarşı yönəlmiş təhlükəni aradan qaldırmaq üçün lazımi tədbirləri görür. Ermənistanın Azərbaycana qarşı təcavüzü beynəlxalq hüququn əsas norma və prinsiplərinin, beynəlxalq humanitar hüququn, o cümlədən 1949-cu il Cenevrə Konvensiyasının və onun Əlavə protokollarının, habelə BMT Təhlükəsizlik Şurasının məlum dörd qətnaməsinin kobud şəkildə pozulmasıdır.

Q.İsrafilov Ermənistan rəhbərliyinin münaqişəni həll etməklə bağlı siyasi istəyinin olmadığını, öz əhalisini sülhə hazırlamaqdansa işğalçılıq siyasətini davam etdirdiyini, öz sələflərinin yolu ilə getdiyini və hətta daha da irəli gedərək danışıqlar prosesinə zərbə vuran bəyanatlarla çıxış etdiyini bildirib.

Ermənistan işğal etdiyi ərazilərdə qurduğu qanunsuz rejimi danışıqlar tərəfi kimi təqdim etməyə cəhd göstərməklə danışıqlar formatına meydan oxuyur. Ermənistanın yüksək vəzifəli məmurları münaqişənin həlli üzrə addım-addım yanaşmanı rədd edir, ATƏT-in əsas sənədlərini və münaqişənin həlli ilə bağlı qərarlarını, həmçinin Helsinki Yekun Aktının prinsiplərini yanlış şərh edirlər.

Bu bəyanatlar və hərəkətlər açıq şəkildə göstərir ki, Ermənistan danışıqlarda konstruktiv iştirak etmək fürsətindən yararlanmamaq yolunu seçdi və baş vermiş faktı (fait accompli) qəbul etdirmək məqsədilə Azərbaycan ərazilərinin işğalını uzatmaq üçün, nəyin bahasına olursa-olsun, sülh prosesinə maneə törətməyə çalışır.

Q.İsrafilov xüsusilə vurğulayıb ki, mövcud status-kvonun davam etməsi və cəbhə xəttindəki gərginlik Azərbaycanın maraqlarına xidmət etmir. Azərbaycan münaqişənin çox qısa müddətdə davamlı həll yolunun tapılmasında ən maraqlı tərəfdir. Lakin Azərbaycan Silahlı Qüvvələri boş oturmayacaq və Ermənistanın təxribatlarına, atəşkəs rejiminin pozulmasına layiqincə cavab verəcək. Nəzərə alınmalıdır ki, nə BMT Təhlükəsizlik Şurasının 1993-cü il tarixli qətnamələri, nə də atəşkəs Ermənistanın davamlı təcavüzü baxımından qurumun Nizamnaməsinin 51-ci maddəsinə əsasən, Azərbaycanı özünümüdafiə hüququndan məhrum etmir. Azərbaycan öz suverenliyini və ərazi bütövlüyünü müdafiə etməyə məcburdur. Həm hüquqi, həm siyasi, həm də mənəvi baxımdan Azərbaycanın beynəlxalq hüquqla tanınan ərazilərində hərəkət etməsi və əməliyyatlar aparması tam qanunidir.

Daimi Şurada bildirilib ki, Azərbaycan Silahlı Qüvvələri Prezidentin müəyyənləşdirdiyi vəzifələrin icrasına uğurla başlayıb və işğal olunmuş ərazilərin bir hissəsini azad edib. Azərbaycan Prezidenti Administrasiyası, Müdafiə Nazirliyi və Xarici İşlər Nazirliyi beynəlxalq humanitar hüquqa, xüsusilə 1949-cu il Cenevrə Konvensiyasına və onun Əlavə protokollarına tam uyğun olaraq təmas xəttinin bütün perimetri boyunca aparılan hərbi əks-hücum əməliyyatı barədə müntəzəm şəkildə brifinqlər təşkil edir və məlumatlar verir.

Azərbaycan suverenliyi və ərazi bütövlüyü tam bərpa olunana, xalqının təhlükəsizliyi üçün təhdid və risklər aradan qaldırılana qədər əks-hücum əməliyyatını davam etdirməkdə qətiyyətlidir.

Q.İsrafilov Azərbaycanın ədalətli mübarizəsində ölkəmizə prinsipial dəstək verən dövlətlərə və beynəlxalq təşkilatlara təşəkkür edib. Səfir ATƏT-in Minsk qrupunun nəhayət ki, Azərbaycanın niyyətinin ciddiliyini tam dərk edəcəyinə ümidvar olduğunu, Ermənistandan öz qoşunlarını Azərbaycanın işğal altındakı ərazilərindən çəkməsinə çağırış edəcəyini və regionda sülhün bərqərar olmasına şərait yaradacağını bildirib.

Diqqətə çatdırılıb ki, münaqişənin həlli yalnız beynəlxalq hüququn norma və prinsiplərinə, həmçinin Helsinki Yekun aktında qeyd edildiyi kimi, Azərbaycan Respublikasının beynəlxalq səviyyədə tanınmış sərhədləri çərçivəsində mümkündür. Ermənistan bu reallıqla nə qədər tez barışsa, münaqişə o qədər tez həll olunar, regiondakı ölkələr və insanlar əməkdaşlıqdan və iqtisadi inkişafdan yararlanarlar.

Elgün Niftəli

AZƏRTAC-ın xüsusi müxbiri

Vyana