Azərbaycan Beynəlxalq İnkişafa Yardım Agentliyinin Seulda təqdimatı olub
Noyabrın 3-5-də Koreya Respublikasının Seonqnam şəhərində keçirilən seminarda Azərbaycan Respublikası Xarici İşlər Nazirliyinin Beynəlxalq İnkişafa Yardım Agentliyinin (AIDA) fəaliyyəti ilə bağlı təqdimat olub.
Xarici İşlər Nazirliyinin mətbuat xidmətindən AZƏRTAC-a bildiriblər ki, noyabrın 6-7-də Seulda keçiriləcək “Səmərəli inkişaf naminə qlobal tərəfdaşlıq” adlı konfransa hazırlıq məqsədilə
təşkil edilən seminarda AIDA-nın əməkdaşı Etibar Kərimov
Agentlik tərəfindən dünyanın müxtəlif ölkələrində həyata keçirilən layihələr barədə danışıb. Donor ölkəsinə çevrilmək niyyətində olan dövlətlər üçün AIDA-nın təcrübəsinin faydalı ola biləcəyini nəzərə alaraq, tədbir təşkilatçıları bu sahədə təcrübə mübadiləsinin aparılması məqsədilə müvafiq tədbirin təşkili üçün yaxın zamanlarda müzakirələrin aparılmasını təklif ediblər.
Qeyd edək ki, Koreya Respublikasının Xarici İşlər Nazirliyi, Koreya Beynəlxalq İnkişaf Agentliyi, BMT-nin İnkişaf Proqramı və Avropa İttifaqının təşəbbüsü ilə təşkil olunan tədbirdə dünyanın 100-ə yaxın ölkəsinin və 10-dan çox beynəlxalq təşkilatın nümayəndələri iştirak edirlər. Tədbirin keçirilməsində məqsəd beynəlxalq inkişaf sahəsində donor və yardım alan ölkələrin təcrübəsini bölüşmək və əməkdaşlıq əlaqələrini gücləndirməkdir.
Bölmənin digər xəbərləri
