Bakı, 19 yanvar (AZƏRTAC). Yanvarın 19-da Azərbaycan Dillər Universitetində (ADU) 20 Yanvar faciəsinin 22-ci ildönümünə həsr olunmuş anma mərasimi keçirilmişdir.

AZƏRTAC xəbər verir ki, əvvəlcə Azərbaycanın müstəqilliyi, ərazi bütövlüyü uğrunda canından keçmiş şəhidlərimizin xatirəsi bir dəqiqəlik sükutla yad edilmişdir.

ADU-nun rektoru, Milli Məclisin deputatı, professor Səməd Seyidov 1990-cı il yanvarın 19-dan 20-nə keçən gecə Sovet ordusunun Azərbaycan xalqına qarşı törətdiyi terror aktının mahiyyətindən, başvermə səbəblərindən, xalqımızın düçar olduğu faciənin ağır nəticələrindən danışmışdır. Bildirmişdir ki, 20 Yanvar və Azərbaycan tarixində ondan əvvəlki faciəli hadisələr XX əsr boyu xalqımıza qarşı yeridilən məkrli siyasətin növbəti təzahürü idi. Azərbaycan xalqına qarşı soyqırımı, sovet hakimiyyəti illərində ərazilərimizin tədricən ilhaq olunması, sovet rəhbərliyinin havadarlığı ilə başlayan Dağlıq Qarabağ hadisələri, azərbaycanlıların Ermənistan ərazisindəki əzəli torpaqlarından zorla qovulması bu siyasətin mərhələləridir.

Rektor qeyd etmişdir ki, 1990-cı ilin yanvar qırğını nə qədər faciəli olsa da, xalqımızın iradəsini, milli azadlıq uğrunda mübarizə əzmini qıra bilmədi. Həmin müdhiş gecədə həlak olan vətən oğulları Azərbaycanın tarixinə parlaq səhifə yazdılar, xalqın milli azadlığı, müstəqilliyi üçün yol açdılar. Universitetin tələbəsi, gənc şair Ülvi Bünyadzadə də həmin gecənin günahsız qurbanlarından biridir.

Digər çıxış edənlər də 22 il əvvəl Bakıda dinc əhaliyə qarşı törədilmiş vəhşiliklər, insanlığa sığmayan cinayətlər, faciənin mahiyyəti barədə danışmış, xatirələrini bölüşmüşlər. Qeyd olunmuşdur ki, Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olmuş 20 Yanvar hadisələri zamanı canından keçənlərin işıqlı xatirələri qədirbilən xalqımızın qan yaddaşında əbədi yaşayacaqdır.