Azərbaycan Dövlət Neft Akademiyasında şəhid tələbələrin xatirəsi yad edilmişdir
Bakı, 18 yanvar (AZƏRTAC). Yanvarın 18-də Azərbaycan Dövlət Neft Akademiyasında (ADNA) ölkəmizin suverenliyi, istiqlaliyyəti və ərazi bütövlüyü uğrunda mübarizənin rəmzi olan 20 Yanvar hadisələrinin 22-ci ildönümünə həsr edilmiş mərasim keçirilmişdir.
AZƏRTAC xəbər verir ki, mərasimdə ölkəmizin azadlığı və torpaqlarımızın toxunulmazlığı uğrunda qurban gedən övladlarımızın xatirələri bir dəqiqəlik sükutla yad olunmuşdur.
Tədbiri giriş sözü ilə açan ADNA-nın rektoru, akademik Siyavuş Qarayev bildirmişdir ki, 1990-cı il yanvarın 20-də SSRİ prezidenti Mixail Qorbaçovun göstərişi ilə sovet ordusunun hissələri həm quru, həm dəniz yolu ilə Bakı şəhərinə soxularaq silahsız insanları gülləbaran etmişlər. Keçmiş sovet dövlətinin hərb maşınının həmin gün Azərbaycan xalqına qarşı həyata keçirdiyi vəhşi terror aktı insanlığa qarşı törədilmiş ən ağır cinayətlərdən biri kimi bəşər tarixində qara səhifə olaraq qalacaqdır. Milli azadlığı, ölkəsinin ərazi bütövlüyü uğrunda mübarizəyə qalxmış dinc əhaliyə divan tutulması, kütləvi terror nəticəsində yüzlərlə günahsız insanın qətlə yetirilməsi və yaralanması totalitar sovet rejiminin süqutu ərəfəsində onun cinayətkar mahiyyətini bütün dünyaya bir daha nümayiş etdirdi.
Rektor demişdir ki, 20 yanvar hadisələri zamanı Neft Akademiyasının üç tələbəsi - Rahim Babayev, Ağabəy Novruzbəyli və Canpolad Orucov da şəhidlik zirvəsinə ucalmışlar. Xalqımız öz qəhrəman övladlarının fədakarlığını yüksək qiymətləndirir və onların xatirəsini ehtiramla yad edir. Təhsil ocağımız da bu ənənəyə uyğun olaraq hər il 20 Yanvar ərəfəsində şəhid tələbələrimizin əziz xatirəsinə ehtiram əlaməti olaraq onların valideynləri və yaxınları ilə görüş keçirir. Öz fədakarlıqları ilə həmyaşıdlarına nümunə olan şəhid tələbələrimizin xatirəsi təhsil ocağımızda daim uca tutulur. Onların təhsil aldıqları fakültələrin qarşısında qoyulmuş və gənclərin ehtiram göstərdikləri büstləri önünə mütəmadi olaraq təzə-tər çiçək dəstələri düzülür.
S.Qaraeyev vurğulamışdır ki, 20 Yanvar və Azərbaycan tarixində ondan əvvəlki faciəli hadisələr iyirminci əsr boyu xalqımıza qarşı yeridilən düşünülmüş siyasətin növbəti təzahürü idi. 1990-cı ilin yanvar qırğını nə qədər faciəli olsa da, Azərbaycan xalqının iradəsini, milli azadlıq uğrunda mübarizə əzmini qıra bilmədi. Həmin müdhiş gecədə həlak olan Vətən oğulları Azərbaycanın tarixinə parlaq səhifə yazdılar, xalqın milli azadlığı, müstəqilliyi üçün yol açdılar.
Xüsusi olaraq qeyd edilmişdir ki, ulu öndərimiz Heydər Əliyev xalqımızın müstəqilliyi və azadlığı uğrunda mübarizədə həyatlarını qurban verən övladlarımızın xatirəsini həmişə uca tutmuş, onların ailə üzvlərinə daim diqqət və qayğı göstərmişdir.
Rektor, ulu öndərimizin siyasi xəttinin layiqli davamçısı Prezident İlham Əliyevə şəhidlərimizə, onların valideynlərinə, ailə üzvlərinə göstərdiyi diqqət və qayğıya görə minnətdarlığımı bildirmişdir.
Tədbirdə akademiyanın şəhid tələbələrinin təhsil aldıqları kimya-texnologiya fakültəsinin dekanı, dosent Elxan Axundov, energetika fakültəsinin dekanı, dosent Yusif Cəbiyev, ADNA-nın həmkarlar ittifaqı komitəsinin sədri Məzahir Babayev və şəhid tələbə Ağabəy Novruzbəylinin atası Oqtay Novruzbəyli çıxış edərək 20 Yanvar faciəsinin dəhşətlərindən və xalqımızın azadlıq mücadiləsindən danışmışlar.
Bildirilmişdir ki, ümummillli lider Heydər Əliyevin ikinci dəfə hakimiyyətə qayıdışından sonra Qanlı Yanvar hadisələrinə tam siyasi-hüquqi qiymət verilmişdir.
Sonda mərasimə yekun vuran Siyavuş Qarayev demişdir ki, bu gün Bakının ən yüksək nöqtələrindən birində hər bir azərbaycanlı üçün müqəddəs and yerinə çevrilmiş bir yer vardır. Bu, 20 Yanvar qurbanlarının və Ermənistanın hərbi təcavüzünə qarşı döyüşlərdə həlak olanların dəfn edildiyi Şəhidlər xiyabanıdır. Hər il yanvarın 20-də yüz minlərlə insan Vətənin azadlığı və suverenliyi uğrunda canlarından keçmiş oğul və qızlarımızın əziz xatirəsini ehtiramla yad etmək üçün bu ünvana gəlir. Nəsillər dəyişəcək, lakin Vətən oğullarının xatirəsi ürəklərdə əbədi yaşayacaqdır.
Mərasimdə ADNA-nın rektoru şəhid tələbələrin valideynlərinə maddi yardım göstərmiş və şəhidlərin xatirəsinə ehsan süfrəsi açılmışdır.
Bölmənin digər xəbərləri
