AZƏRBAYCAN DÖVLƏTİ QADINLARIN CƏMİYYƏTİN HƏYATINDA FƏAL İŞTİRAKINI YÜKSƏK QİYMƏTLƏNDİRİR
Öz zəkası, müdrikliyi, sədaqəti və saflığı ilə seçilən Azərbaycan qadınları ölkəmiz müstəqilliyini bərpa etdikdən sonrakı dövrdə də həyatın bütün sahələrində fəal mövqe tutaraq cəmiyyətimizdə gedən demokratikləşmə prosesində iştirak edir və Vətənimizin tərəqqisinə sanballı töhfələr verirlər.
Qadınların cəmiyyətdəki rolunun yüksəldilməsinə, ictimai-siyasi həyatdakı fəallığının gücləndirilməsinə daim qayğı göstərən Azərbaycan dövləti onların xidmətlərini də yüksək qiymətləndirir.
AZƏRTAC xəbər verir ki, Prezident İlham Əliyevin sentyabrın 25-də, Azərbaycan qadınlarının III qurultayı ərəfəsində qadınların böyük bir qrupunun fəxri adlar, orden və medallarla təltif olunması, onlara Prezidentin fərdi təqaüdlərinin verilməsi haqqında sərəncamlar imzalamışdır.
Filologiya elmləri doktoru Nüşabə Araslı, Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanova “Şöhrət” ordeni ilə təltif edilmiş, Bülbül adına Bakı Orta İxtisas Musiqi məktəbinin direktoru Nigar Əsgərova və Azərbaycan Rəssamlıq Akademiyasının kafedra müdiri Validə Məmmədova “Əməkdar incəsənət xadimi”, təhsil nazirinin müavini İradə Hüseynova, Azərbaycan Müəllimlər İnstitutunun rektoru Aqiyə Naxçıvanlı və Azərbaycan Dövlət Neft Akademiyasının professoru Nigar Səlimova “Əməkdar müəllim”, Azərbaycan Tibb Universitetinin kafedra müdiri Hicran Bağırova “Əməkdar həkim” fəxri adlarına layiq görülmüşlər.
Xalq artisti, bəstəkar Sevda İbrahimovaya və filologiya elmləri doktoru, professor Rəhilə Məhərrəmovaya Prezidentin fərdi təqaüdləri verilmişdir.
Təhsil, səhiyyə, mədəniyyət sahəsində çalışan qadınların bir qrupu “Tərəqqi” medalı ilə təltif edilmiş, müxtəlif fəxri adlar almışdır.
Bölmənin digər xəbərləri
