Azərbaycan güləş millisinin məşqçisi: Gimnaziadada öz idmançılarımızı favorit hesab edirik - MÜSAHİBƏ
Zlatibor, 8 aprel, Cavid Əliyev, AZƏRTAC
Serbiyada keçirilən Gimnaziada İdman Oyunlarında mübarizə aparacaq qız güləşçilərdən ibarət Azərbaycan millisinin məşqçisi Solmaz Adilova AZƏRTAC-ın suallarını cavablandırıb. Həmin müsahibəni təqdim edirik.
- Bu gün Azərbaycanın qız güləşçiləri Gimnaziadada mübarizəyə start verirlər. Gözləntiləriniz nələrdir?
- İki-üç qızdan başqa, digərlərinin ilk yarışıdır. Komandamızın bəzi üzvləri ötən il U-15 Avropa çempionatında iştirak ediblər. Gimnaziadada mübarizə aparacaq bütün qızlar yerli idmançılarımızdır. Hər üç əyarlı - qızıl, gümüş və bürünc medalların olacağını gözləyirəm. Çox yaxşı hazırlaşmışıq. Sadəcə, bir çoxunun ilk yarışı olduğu üçün həyəcan ola bilər. Həyəcanı dəf edə bilsələr, nəticəmiz uğurlu olacaq. Buraya gətirdiyimiz qızları sırf medal üçün hazırlamışıq. Hətta həyətdə bir ad var ki, o, gələcəkdə Azərbaycanın güləş tarixinə düşəcək.
- Hansı ölkədən olan rəqibləri daha güclü hesab edirsiniz?
- Güləş tarixində bir çox uğurlara imza atmış Ukrayna, Türkiyə komandaları buradadır. Onların heyətində yaxşı idmançılar var. Lakin biz də zəif deyilik. Öz idmançılarımızı favorit hesab edirik.
- Azərbaycanda qadın güləşinin inkişafı barədə nə deyə bilərsiniz?
- Biz güləşdiyimiz dövrdə də respublika çempionatı keçirilirdi. Lakin həmin vaxt 5-6 güləşçini eyni çəki dərəcəsinə salırdılar. Aprelin 19-da başlayacaq U-15 və U-17 respublika çempionatlarında idmançı sayı çoxdur. 15 yaşlılarda 80-dən çox ad var. Əvvəlki illərlə müqayisədə, indi Azərbaycan güləşinə axın çoxdur. Sevindirici hal odur ki, bölgələrdən də bizimlə əlaqə saxlayıb, güləşə yazılmaq istəyənlər var.
- Bölgələrdə seleksiya işləri aparırsınız?
- Azərbaycan Güləş Federasiyası respublika çempionatlarını rayonlarda təşkil edir. Bu da seleksiya işləri üçün atılan addımlardan biridir.
- Azərbaycanın hansı bölgələrində qadın güləşinə maraq daha böyükdür?
- Son dövrlərdə qeydə alınan nəticələr valideynlərdə güləşə olan marağı artırıb. Artıq özləri uşaqlarını bu idman növünə yazdırırlar. Gəncə, Qax, Astaradan Bakıya gələnlər var. Amma digər rayonlardan da müraciət edirlər.
- Sizcə, qızlar arasında bu idman növünə marağı artırmaq üçün hansı işlər görülməlidir?
- Əvvəllər sosial şəbəkələrdə məşqlərdən videolar paylaşırdım. Bu, həm güləşçinin özünü, həm də kənarda olan qızları güləşə həvəsləndirir. İndi bir kitab üzərində işləyirəm. Həmin kitab bütün idman növlərində mübarizə aparan qızları həvəsləndirəcək. Çap olunduqdan sonra bütün federasiyalara hədiyyə etmək istəyirəm. İstəyim qızlarımızın həmin kitabı oxuyaraq, yarışlara motivasiyalı hazırlaşmağıdır.
Bölmənin digər xəbərləri
