AZƏRBAYCAN İLƏ İRAQ ARASINDA ƏMƏKDAŞLIQ ƏLAQƏLƏRİNİN GENİŞLƏNDİRİLMƏSİ MƏSƏLƏLƏRİ MÜZAKİRƏ OLUNMUŞDUR
AZƏRTAC xəbər verir ki, sentyabrın 26-da Azərbaycan Respublikasının Baş naziri Artur Rasizadə Heydər Əliyev Fondunun, Gənclər və İdman Nazirliyinin təşkilatçılığı ilə Bakıda keçirilən dünya gənclərinin IV məşğulluq sammitində (YES) iştirak etmək üçün ölkəmizə gəlmiş İraqın gənclər və idman naziri Casim Məhəmməd Cəfər ilə görüşmüşdür.
Səmimi görüşə görə Baş nazirə təşəkkür edən Casim Məhəmməd Cəfər bölgənin ən inkişaf etmiş ölkəsi olan Azərbaycana səfərindən məmnun qaldığını bildirərək, Bakı sammitinin yüksək səviyyədə təşkil edildiyini vurğulamışdır. Qonaq demokratik dövlət quruculuğu yolu ilə irəliləyən İraqda infrastrukturun bərpasında, habelə neft-qaz sənayesinin, humanitar sahənin, elm, təhsil, mədəniyyət qurumlarının dirçəldilməsində Azərbaycanın köməyinə böyük ehtiyac duyduğunu, iqtisadiyyat sahəsində respublikamızın topladığı zəngin təcrübədən İraq xalqının da yararlanmasının faydalı olacağını nəzərə çatdırmışdır. İraqlı nazir bu məqsədlə ölkəsinin Baş naziri Nuri Əl Malikinin Azərbaycanın Baş nazirinə ünvanladığı müraciətin mətnini Artur Rasizadəyə təqdim etməkdən şərəf duyduğunu bildirmişdir.
Baş nazir Artur Rasizadə ölkəmizin böyük məmnuniyyətlə dost İraqla əlaqələri genişləndirməyə, onun dirçəlişi üçün hərtərəfli kömək göstərməyə, xüsusilə neft-qaz sahələrində təcrübə mübadiləsinin aparılmasına, müxtəlif istehsal sahələrinə investisiya qoyuluşuna, habelə mədəni-humanitar sahədə əməkdaşlığa hazır olduğunu qonağın nəzərinə çatdırmışdır. Baş nazir bütün bu irimiqyaslı işlərin həyata keçirilməsi üçün hər iki ölkənin müvafiq qurumları arasında əlaqələrin genişləndirilməsinin vacibliyini vurğulamışdır.
Görüşdə tərəfləri maraqlandıran bir sıra digər məsələlər ətrafında da fikir mübadiləsi aparılmışdır.
Bölmənin digər xəbərləri
