AZƏRBAYCAN LONDONDA KEÇİRİLƏN BEYNƏLXALQ SƏRGİ-YARMARKADA TƏMSİL OLUNUR
Sərgiyə gələnlər pavilyonumuzda qədim və müasir Azərbaycana virtual ekskursiyaya çıxacaq, muğam üçlüyü və əməkdar artist Aygün Hümbətovanın ifasında milli musiqimizlə tanış olacaqlar.
39,5 min kvadratmetr sahədə açılmış budəfəki yarmarkada 190 ölkədən 5 mindən çox şirkət iştirak edir. London sərgi-yarmarkası peşəkar xarakter daşıyır və əhalinin geniş təbəqəsi üçün nəzərdə tutulmamışdır. Tədbirə turizm və kurort biznesinin nümayəndələri, hökumət təşkilatlarının turizm məsələləri ilə məşğul olan məmurları, hotel və restoran sahibləri, aviaşirkətlərin rəhbərləri, səyahətlər üçün müxtəlif avadanlıq və ləvazimat istehsalçıları, turizm haqqında yazan jurnalistlər toplaşırlar.
Xarici KİV-lərin yazdığına görə, Londonda baş vermiş son hadisələrlə əlaqədar sərgi çərçivəsində “Səyahət industriyasının beynəlxalq terrorizmə strateji cavabı” mövzusunda seminar təşkil olunacaqdır. Beynəlxalq Turizm vasitəsilə Sülh İnstitutunun təşkil etdiyi seminar İordaniya kralının xüsusi müşaviri Akel Biltacinin sədrliyi ilə keçiriləcəkdir.
