AZƏRBAYCAN NÜMAYƏNDƏ HEYƏTİ ROMADA KEÇİRİLƏN DÜNYA ƏRZAQ TƏHLÜKƏSİZLİYİ ÜZRƏ SAMMİTDƏ İŞTİRAK EDİR
Roma, 17 noyabr (AZƏRTAC). Noyabrın 16-dan İtaliyanın paytaxtı Romada BMT-nin Ərzaq və Kənd Təsərrüfatı Təşkilatının (FAO) baş qərargahında quruma üzv ölkələrin dövlət və hökumət başçıları səviyyəsində dünya ərzaq təhlükəsizliyi üzrə sammit keçirilir. Ayın 18-də başa çatacaq sammitdə Azərbaycan Respublikasının kənd təsərrüfatı naziri İsmət Abasovun rəhbərlik etdiyi nümayəndə heyəti təmsil edir.
Azərbaycanın İtaliyadakı səfirliyinin mətbuat xidmətindən bildirmişlər ki, tədbir çərçivəsində noyabrın 17-də İsmət Abasovun Türkiyənin Baş naziri Rəcəb Tayyib Ərdogan və bu ölkənin kənd təsərrüfatı naziri Məhmət Mehdi Əkər ilə ikitərəfli görüşü keçirilmişdir.
Görüşdə İsmət Abasov Azərbaycanda kənd təsərrüfatı sahəsində həyata keçirilən islahatlar və bunun nəticəsində əldə edilmiş nailiyyətlər barədə məlumat vermiş, həmçinin Azərbaycan ilə Türkiyə arasında mövcud ikitərəfli münasibətləri və onların inkişaf perspektivlərini yüksək qiymətləndirmişdir.
Türkiyənin Baş naziri Rəcəb Tayyib Ərdogan Azərbaycan Prezidenti İlham Əliyev tərəfindən ölkədə uğurla həyata keçirilən iqtisadi siyasəti vurğulamış, Azərbaycan iqtisadiyyatının bütün sahələrində, o cümlədən kənd təsərrüfatı sektorunda da yüksək nailiyyətlərin əldə olunduğunu qeyd etmişdir. O, həmçinin ikitərəfli siyasi və iqtisadi münasibətlərin perspektivlərindən danışmış və əməkdaşlıq üçün mövcud potensialdan tam istifadə edilməsinin vacibliyini diqqətə çatdırmışdır.
Sammit çərçivəsində kənd təsərrüfatı naziri İsmət Abasovun FAO-nun rəhbərləri, habelə İsrail, Avstriya və digər üzv ölkələrin nümayəndə heyətlərinin başçıları ilə də görüşləri keçirilmişdir.
Bölmənin digər xəbərləri
