İDMAN
Azərbaycan Premyer Liqası: Bu gün daha iki oyun keçiriləcək
Bakı, 23 dekabr, AZƏRTAC
Bu gün futbol üzrə Azərbaycan Premyer Liqasında XVIII turun daha iki oyunu keçiriləcək.
AZƏRTAC xəbər verir ki, günün ilk matçı Tovuzda yerli komanda ilə “Araz-Naxçıvan” arasında olacaq. Hazırda meydan sahibləri 19 xalla səkkizinci, qonaqlar isə 26 xalla dördüncü pillədə qərarlaşıblar.
Bu görüş komandaların ölkə çempionatlarında ikinci dueli olacaq. Rəqiblərin yeganə qarşılaşması I dövrədə baş tutub. “Turan Tovuz” səfərdə 3:0 hesablı qələbə qazanıb.
Günün son oyununda isə “Sumqayıt” və “Səbail” komandaları üz-üzə gələcəklər. “Kapital Bank Arena”da keçiriləcək görüş saat 18:30-da başlayacaq. 17 turdan sonra 24 xalı olan “gənclik şəhəri” təmsilçisi altıncı, 26 xalı olan “dənizçilər” isə üçüncüdür.
Komandalar indiyədək Premyer Liqada 23 dəfə qarşılaşıblar. Bunların 12-si sumqayıtlıların, 8-i bakılıların xeyrinə başa çatıb. Üç qarşılaşmada qalib müəyyənləşməyib. Topların nisbətində də meydan sahibləri üstündür - 31:19.
“Sumqayıt” son 4 matçı qolsuz tərk etməyib. Son üç görüşdə qonaq komanda qalib gəlib.
Azərbaycan Premyer Liqası
XVIII tur
23 dekabr (şənbə)
16:00. “Turan Tovuz” - “Araz-Naxçıvan”
Hakimlər: Rəvan Həmzəzadə, Vüsal Məmmədov, Eyyub İbrahimov, Emin Əliyev
Hakim-inspektor: İmanxan Sultani
AFFA nümayəndəsi: Mübariz Hüseynov
Tovuz şəhər stadionu.
18:30. “Sumqayıt” - “Səbail”
Hakimlər: Rəşad Əhmədov, Elşad Abdullayev, Pərvin Talıbov, Rauf Allahverdiyev
Hakim-inspektor: Vüsal Əliyev
AFFA nümayəndəsi: Asif Əliyev
“Kapital Bank Arena”.
Qeyd edək ki, XVIII turun açılış oyununda “Qəbələ” öz meydanında “Sabah”a 1:0 hesabı ilə qalib gəlib. Tura dekabrın 24-də keçiriləcək “Neftçi” - “Kəpəz” və “Zirə” - “Qarabağ” matçları ilə yekun vurulacaq.