Azərbaycan Premyer Liqası: “Turan Tovuz” doğma meydanda “Qəbələ”ni məğlub edib
Bakı, 13 fevral, AZƏRTAC
Futbol üzrə Azərbaycan Premyer Liqasında XXII turun növbəti oyunu keçirilib.
AZƏRTAC xəbər verir ki, günün ilk matçında “Turan Tovuz” və “Qəbələ” komandaları üz-üzə gəliblər. Tovuz şəhər stadionunda baş tutan görüş meydan sahiblərinin 2:1 hesablı qələbəsi ilə yekunlaşıb.
Hesabı 43-cü dəqiqədə tovuzluların heyətində Aleks Souza açıb. Ayxan Quseynov 53-cü dəqiqədə ikinci topu “qırmızı-qaralar”ın qapısından keçirib. Matçın yekun nəticəsini 77-ci dəqiqədə qonaqların yarımmüdafiəçisi Bilel Auşeriya müəyyənləşdirib.
Bu qələbədən sonra xallarını 29-a çatdıran “Turan Tovuz” 6-cı sıraya yüksəlib. “Qəbələ” isə 15 xalla sonuncu pillədə qərarlaşıb.
Tura bu gün keçiriləcək “Zirə” - “Sumqayıt” və “Araz-Naxçıvan” - “Neftçi” oyunları ilə yekun vurulacaq.
Qeyd edək ki, XXII turun əvvəlki oyunlarında “Qarabağ” və “Sabah” komandaları 3:3 hesablı sülhə razılaşıblar, “Səbail” isə səfərdə “Kəpəz”i məğlub edib - 4:1.
Bölmənin digər xəbərləri
