Oktyabrın 9-da Bakı metrosunun yeni tikilmiş “Nəsimi” stansiyasının açılışı olmuşdur.

Azərbaycan Prezidenti İlham Əliyev mərasimdə iştirak etmişdir.

Tikintisinə 2006-cı ildə başlanmış stansiyanın ağır hidrogeoloji şəraitdə inşa olunmasına baxmayaraq, işlər vaxtından əvvəl yerinə yetirilmişdir. Stansiyada qatarların hərəkətinin tənzimlənməsi və texniki nəzarət kompyuterləşdirilmişdir. Burada 250-dən çox adam işlə təmin olunmuşdur.

“Memar Əcəmi” stansiyasından “Nəsimi” stansiyasına qədər xəttin uzunluğu 2660 metr, yeni stansiyada platformanın uzunluğu 102 metr, eni isə 18 metrdir. Dörd çıxışı olan stansiyada eskalatorlar quraşdırılmışdır. Tikinti işlərini “Azərtunelmetrotikinti” Qapalı Səhmdar Cəmiyyəti görmüşdür. Stansiyanın tikintisini daim diqqətdə saxlayan Prezident İlham Əliyev bu il avqustun 27-də görülən işlərin gedişi ilə tanış olmuş, müvafiq tövsiyələrini vermişdi.

Dövlətimizin başçısı “Nəsimi” stansiyasının yerləşdiyi ərazini seyr etdi, yaxınlıqdakı binalarda görülən təmir-bərpa işlərinə baxdı.

Baş nazirin müavini Abid Şərifov, Bakı Metropoliteninin rəisi Tağı Əhmədov məlumat verdilər ki, inşaat işlərini bütünlüklə yerli mütəxəssislər yerinə yetirmişlər. Bakı Metropolitenində ən müasir avadanlıq, enerji bloku ilk dəfə məhz “Nəsimi” stansiyasında quraşdırılmışdır. Paytaxtın 6-cı və 9-cu mikrorayonlarını birləşdirən “Nəsimi” stansiyasının akademik Zərifə Əliyeva adına Elmi Tədqiqat Oftalmologiya İnstitutu, 9-cu mikrorayon, Z.Əliyeva adına istirahət bağı, 9 nömrəli təcili yardım stansiyası və 6-cı mikrorayon istiqamətlərinə çıxışları vardır. Uzun fasilədən sonra tikilən bu stansiyanın davamı olaraq çəkilən xətt ilin sonunadək digər stansiya ilə birləşdiriləcək və paytaxtda nəqliyyat probleminin həllinə kömək edəcəkdir. İlk növbədə, şəhərdaxili şəbəkənin genişləndirilməsini və paytaxt əhalisinin tələbatının tam ödənilməsi məqsədi ilə metropolitenin yeni stansiyalarının çəkilməsi ilə bağlı layihələr də hazırlanmışdır.

Prezident İlham Əliyev metro stansiyasının giriş və çıxışlarında görülən işlərə baxdı və rəmzi açılışı bildirən lenti kəsdi. Dövlətimizin başçısı stansiyada metropoliten işçiləri və inşaatçılarla görüşdü.

“Azərtunelmetrotikinti” Qapalı Səhmdar Cəmiyyətinin sədri Şaiq Əfəndiyev ulu öndər Heydər Əliyevin ölkəmizdə metro tikintisinə verdiyi önəmi xatırladaraq dedi ki, cənab Prezident, çox şadıq ki, bu ənənə Sizin tərəfinizdən davam etdirilir.

Prezident İLHAM ƏLİYEV metropoliten işçilərinə və inşaatçılara müraciətlə dedi:

-Bu, çox böyük hadisədir. Sizi yeni stansiyanın açılışı münasibətilə təbrik edirəm. Eyni zamanda, sizə, metro stansiyasının tikintisində iştirak etmiş bütün insanlara öz təşəkkürümü bildirmək istəyirəm. Bu, doğrudan da, böyük hadisədir, deyə bilərəm ki, bunun tarixi əhəmiyyəti var. Uzun fasilədən sonra Bakı şəhərində yenidən metro stansiyaları tikilmişdir.

Bakıda metro çoxdan fəaliyyət göstərir. Bakı Sovet İttifaqının ilk şəhərlərindən biri, beşinci şəhər idi ki, burada metro stansiyası tikilmişdi. Ancaq Sovet İttifaqı dağılandan və bütün postsovet məkanında yaşanmış böhranlı hadisələrdən sonra, əlbəttə ki, metro tikintisinə də fasilə verildi. Məndə olan məlumata görə, indi keçmiş postsovet məkanında metro stansiyaları Rusiyada, Ukraynada, yəni beş-altı şəhərdə, o cümlədən Bakı şəhərində tikilibdir. Mən buraya avqust ayında gəlmişdim. Növbəti stansiyaların tikintisi də nəzərdə tutulur. Bu, böyük bir proqramdır. Mən hesab edirəm ki, bir neçə il ərzində Bakının nəqliyyat infrastrukturunun təkmilləşməsi üçün bir neçə yeni stansiya tikiləcəkdir. Bu proqram var, maliyyə vəsaiti də ayrılacaq və əminəm ki, siz gələcəkdə yeni stansiyaların tikintisində uğurla iştirak edəcəksiniz.

ABİD ŞƏRİFOV: Cənab Prezident, proqram artıq hazırlanmışdır. Siz buraya gəlib inşaat işlərinin gedişi ilə tanış olanda göstəriş verdiniz ki, hansı istiqamətlərdə metro xətlərinin çəkilməsini gələn ilin investisiya proqramına salmalıyıq. Bu barədə Sizə məruzə olunmuşdu və həmin proqram Sizə təqdim ediləcəkdir.

İLHAM ƏLİYEV: Hər il Bakı şəhərində metro tikintisi aparılacaqdır. İndi deyə bilmirəm ki, siz hər il bir stansiyanı təhvil verə biləcəksiniz, yoxsa yox. Bu, daha çox sizin işinizdən asılı olacaqdır. O ki qaldı maliyyə məsələlərinə, burada heç bir çətinlik olmayacaqdır.

ABİD ŞƏRİFOV: Cənab Prezident, inşallah Sizin rəhbərliyiniz altında bütün işlər görüləcəkdir.

İLHAM ƏLİYEV: Amma əsas odur ki, metro tikintisi bundan sonra Azərbaycanda hər il, uzun illər ərzində aparılacaqdır. Biz elə etməliyik ki, bütün şəhərimizi metro ilə əhatə edək. Çünki metro həm ən ucuz, həm də ən rahat nəqliyyat vasitəsidir. İndi hamı yaxşı bilir ki, metro tarifləri dəyişməz olaraq qalır. Yəqin ki, dünyada ən ucuz tariflər Azərbaycandadır. Mən onu da demək istəyirəm, dəfələrlə müraciətlər olunmuşdu ki, biz tarifləri qaldıraq, bu, rentabelli deyil, yəni metro zərərlə işləyir. Mən demişəm ki, eybi yoxdur, qoy Azərbaycan dövləti metropolitenə dotasiya ayırsın. Amma biz qiymətə baxmayacağıq və nə qədər mümkündür, bu qiymətlər dəyişməyəcəkdir. Çünki, bir daha demək istəyirəm ki, bu, ən kütləvi nəqliyyat vasitəsidir. Növbəti illərdə yeni stansiyaların tikintisi hesabına biz bütün şəhərimizin infrastrukturunu müasirləşdirəcəyik və insanların rahatlığı üçün çox böyük işlər görüləcəkdir.

TAĞI ƏHMƏDOV (Bakı Metropoliteninin rəisi): Cənab Prezident, ən yaxşı hal budur ki, bu, müstəqilliyimiz dövründə öz gücümüzə tikilən stansiyadır.

İLHAM ƏLİYEV: Bəli, düzdür.

TAĞI ƏHMƏDOV: Ulu öndərimizin rəhbərliyi dövründə 14 stansiya tikilib istifadəyə verilmişdir. “Nəsimi” sayca 21-ci stansiyadır.

X X X

Sonra dövlətimizin başçısı qatarla “Nəsimi” stansiyasından “Elmlər Akademiyası” stansiyasına yola düşdü.

Prezident İlham Əliyevə 1967-ci ildən istismarda olan Bakı metropoliteninin yeni inkişaf proqramı barədə ətraflı məlumat verildi. Bildirildi ki, hazırda metronun üçüncü növbəsinin Şimal sahəsində “Azadlıq prospekti” stansiyasının inşası davam edir. Ən yüksək səviyyədə yenidən qurulan “İçərişəhər” stansiyası da tezliklə açılacaqdır. “28 May” stansiyasının ikinci çıxışının tikintisi də başa çatır. Yeni avtovağzalın ərazisində metro stansiyasının tikintisi məqsədəuyğun sayılmışdır. 2025-ci ilə qədər metro stansiyalarının sayını 62-yə çatdırmaq nəzərdə tutulur. Oktyabrın 16-dan metropolitendə 30 cüt qatar xəttə buraxılacaq, bu da qatarların hərəkət intervalını iki dəqiqəyə endirilməsinə imkan verəcəkdir. Xüsusilə sərnişin axınının gur saatlarında qatarların sayı artırılacaqdır. Gələcəkdə Sumqayıt şəhərinə də metro xəttinin çəkilməsi planlaşdırılır.

Azərbaycan Prezidenti metropolitenin yeni inkişaf planının yerinə yetirilməsinə dövlət tərəfindən hər cür köməyin göstəriləcəyini vurğuladı, “Nəsimi” stansiyasının açılışı münasibətilə metro işçilərini bir daha təbrik etdi, onlara uğurlar arzuladı.

######