RƏSMİ XRONİKA
AZƏRBAYCAN PREZİDENTİ İLHAM ƏLİYEVİN BƏYANATI
![AZƏRBAYCAN PREZİDENTİ İLHAM ƏLİYEVİN BƏYANATI](/files/2008/2/1200x630/14864526971560140979_1200x630.jpg)
![](/media/newsimages/2008/June/file1212602356263.jpg)
Rəcəb Tayyib Ərdoğan!
Hörmətli xanımlar və cənablar!
Hörmətli mətbuat nümayəndələri!
Mən bir daha Türkiyənin Baş nazirini və onunla bərabər
Naxçıvana gəlmiş nümayəndə heyətinin bütün üzvlərini Naxçıvanda, Azərbaycanın qədim torpağında salamlayıram, sizə “Xoş gəlmisiniz!” deyirəm.
Biz hörmətli Baş nazirlə mütəmadi qaydada həm Bakıda, həm də Ankarada, İstanbulda, başqa şəhərlərdə görüşürük. Ancaq ilk dəfədir ki, bizim görüşümüz Naxçıvanda baş verir. Mən çox minnətdaram ki, hörmətli Baş nazir vaxt tapıb Naxçıvana gəlibdir. Bunun çox böyük siyasi mənası var. Naxçıvan o yerdir, o şəhərdir, o respublikadır ki, Türkiyə ilə Azərbaycan arasında yeganə sərhəd buradadır. Naxçıvanın inkişafında, xüsusilə onun 1990-cı illərin əvvəllərində yaşanan böhranlı vəziyyətdən çıxmasında Türkiyə ilə olan əlaqələr, körpünün tikilməsi və bütövlükdə Türkiyədən alınan dəstək çox mühüm rol oynamışdır. Bu gün isə bizim ölkələr arasında münasibətlər bütün sahələrdə sürətlə inkişaf edir. Biz bu gün bütün ikitərəfli məsələlərin istiqamətlərini müzakirə etdik. Bütün müzakirə olunan məsələlərdə mövqeyimiz birdir, üst-üstə düşür. Siyasi əlaqələr sürətlə inkişaf edir, bizim iqtisadi imkanlarımız artır, biz birlikdə dünya üçün çox əhəmiyyətli olan və ölkələrimizi böyük dərəcədə gücləndirən enerji layihələrini həyata keçiririk.
Biz bu gün, eyni zamanda, Ermənistan-Azərbaycan, Dağlıq Qarabağ münaqişəsinin həlli sahəsində aparılan işlər və gələcək planlar haqqında danışdıq, fikir mübadiləsi apardıq. Türkiyənin bu məsələdə mövqeyi və dəstəyi bizim üçün çox önəmlidir. Xüsusilə Birləşmiş Millətlər Təşkilatının Baş Məclisində keçirilən son səsvermə zamanı işğal olunmuş ərazilərdə yaranan vəziyyətlə bağlı qətnamənin qəbul edilməsində Türkiyənin dəstəyi və mövqeyi çox mühüm olmuşdur.
Eyni zamanda, biz gələcək fəaliyyət, birgə layihələr haqqında geniş müzakirə apardıq. Bakı-Tbilisi-Ceyhan, Bakı-Tbilisi-Ərzurum və Bakı-Tbilisi-Qars kimi nəhəng layihələr bizi daha da sıx birləşdirir. Bu layihələr, eyni zamanda, bütün türk dünyası üçün çox böyük əhəmiyyət kəsb edir. Çünki digər türkdilli dövlətlər bu layihələrdən səmərəli şəkildə istifadə edə bilərlər və bunun üçün artıq ilkin razılaşmalar vardır. Həm enerji, həm də ki, nəqliyyat layihələrində biz geniş əməkdaşlığa açığıq. Bizim münasibətlərimiz, eyni zamanda, regional işbirliyinə böyük töhfədir və Türkiyə və Azərbaycanın iştirakı olmadan bölgədə heç bir layihə, heç bir təşəbbüs reallaşa bilməz.
Əlbəttə ki, biz bu imkanlardan daha da səmərəli istifadə etməliyik. Bu gün artıq qarşılıqlı sərmayələr qoyulması sahəsində yeni dövr başlayır. Artıq Azərbaycan şirkətləri Türkiyə sənayesinə, infrastrukturuna öz sərmayələrini qoyurlar və bu, bizim üçün çox önəmlidir. Çünki Azərbaycan şirkətləri tərəfindən xaricdə ən böyük sərmayələr qardaş ölkədə qoyulur ki, bu da təbiidir. Gələcəkdə ölkələrimizin artan iqtisadi və siyasi imkanları, artan çəkisi, əlbəttə ki, bizim mövqelərimizi daha da möhkəm edəcəkdir.
Bu gün haqqında danışılan bütün məsələlər bizi çox sevindirir, yeni imkanlar açır. Xüsusilə Naxçıvanın enerji təhlükəsizliyi və blokadadan çıxması üçün lazım olan addımların atılması Naxçıvan Muxtar Respublikasının uzunmüddətli inkişaf imkanlarını daha da genişləndirəcəkdir. Bu barədə də biz danışdıq.
Bir sözlə, əziz dostlar, mən bir daha aparılan danışıqların mahiyyətindən çox razıyam. Bir daha demək istəyirəm ki, danışılan bütün məsələlərdə bizim mövqeyimiz birdir və əminəm ki, Türkiyənin Baş nazirinin Naxçıvana, Naxçıvan Muxtar Respublikasına tarixi səfərindən sonra bizim qarşımızda yeni imkanlar, yeni üfüqlər açılacaqdır.
Təşəkkür edirəm.
######
![]() |
![]() |