AZƏRBAYCAN PREZİDENTİ İLHAM ƏLİYEVİN BƏYANATI
- Əvvəlcə, mən zirvə görüşünün əla təşkil olunmasına və bizə göstərilmiş qonaqpərvərliyə görə Prezident Saakaşviliyə öz minnətdarlığımı bildirirəm və onu təbrik edirəm.
Bu tədbir təşkilatımızın inkişafında vacib bir mərhələ oldu. Azərbaycan ötən il Bakıda GUAM-ın sədrliyini qəbul etdi və biz son bir il ərzində əldə olunmuş nailiyyətləri müzakirə etdik. Bu müddətdə təşkilat daha səmərəli fəaliyyət göstərmişdir. Üzv ölkələr arasında, o cümlədən zirvə görüşündə qonaq qismində iştirak edən ölkələr arasında münasibətlər uğurla inkişaf edir. Bu gün əminliklə deyə bilərik ki, GUAM səmərəli beynəlxalq təşkilata çevrilib. Biz bir-birimizə beynəlxalq səviyyədə və təşkilatlar çərçivəsində dəstək veririk. Biz hər zaman bir-birimizə yardım etməyə çalışırıq. Bir çox halları nümunə kimi gətirə bilərik ki, ölkələrimiz arasında praktiki əməkdaşlıq qarşılıqlı fayda vermişdir. Biz bir-birimizə bütün siyasi işlərimizdə güclü dəstək veririk. Bu gün mən geniş iclas zamanı bildirdim və yenə də bildirmək istəyirəm ki, Azərbaycan BMT-nin Baş Məclisində ölkəmizin işğal olunmuş əraziləri ilə bağlı irəli sürdüyü qətnaməyə dəstək vermiş bütün ölkələrə olduqca minnətdardır. GUAM-ın bütün üzvləri həmin qətnamənin lehinə səs vermişlər. Eyni birlik və həmrəyliyi biz, həmçinin Gürcüstanın öz ərazi bütövlüyü ilə bağlı qətnaməsi irəli sürüləndə gördük.
Regional təhlükəsizlik məsələlərinə göz yummaq olmaz. Çünki gələcək inkişafımız, iqtisadi və sosial tərəqqi məhz regional təhlükəsizlik məsələsindən asılıdır. Bu gün ölkələrimizin ərazi bütövlüyü pozulub. Gürcüstan və Azərbaycan etnik təmizləmə siyasətindən əziyyət çəkir. Bu siyasətin nəticəsində yüz minlərlə vətəndaşımız məcburi köçkün vəziyyətinə düşmüşdür. Onlar mülkiyyətindən, adi insan hüquqlarından məhrum olmuşlar. Bu gün bir milyon insan təcavüz, işğal, separatçılıq və ərazi bütövlüyünün pozulmasından əziyyət çəkir. Biz ərazi bütövlüyünün bərpa edilməsi səylərində həmrəyik. Azərbaycanda biz məsələni siyasi yolla həll etməyə çalışırıq. Lakin onun həlli yalnız ərazi bütövlüyü prinsipi və beynəlxalq hüquq normaları əsasında tapılmalıdır. Eyni zamanda, biz Azərbaycanın ərazi bütövlüyünü bərpa etmək üçün əlimizdən gələni edirik. Bu səbəbə görə, regional təhlükəsizlik məsələsi böyük diqqət tələb edir. Bugünkü sammitdə qəbul olunmuş sənədlər ölkələrimiz arasında gələcək əməkdaşlıq üçün çox əhəmiyyətlidir.
Artıq dostum Prezident Saakaşvilinin qeyd etdiyi kimi, bu gün səhər biz Batumidə yaşayan bir gürcü ailəsinə baş çəkdik. Bizim çox səmimi görüşümüz oldu. Mən bunu mərasim yox, məhz görüş adlandırıram. Bu, adi ailənin prezidentlər ilə keçirdiyi səmimi görüşü idi. Azərbaycan qazı artıq Batumiyə çatmışdır. Bu, tarixi hadisədir. Bu, tarixdə ilk dəfə idi ki, baş verirdi, çünki bildiyimə görə, əvvəllər bu yerlərdə qaz olmamışdır. Beləliklə, bundan sonra Batumi və onun ətraf yerlərində yaşayan sakinlər təbii qaz almağa başlayacaqlar. Bu, yalnız Gürcüstan ilə Azərbaycan arasında aparılan əməkdaşlıq sayəsində mümkün olmuşdur.
Əməkdaşlığımız iqtisadiyyatımıza, siyasi inteqrasiyamıza və təhlükəsizliyimizə, o cümlədən regional əməkdaşlığa böyük təsir göstərir. Biz regionda böyük enerji layihələrini birgə həyata keçirmişik. Əməkdaşlıq regionda siyasi münasibətlər sisteminə güclü təsir göstərir. Artıq sirr deyil ki, enerji təhlükəsizliyi beynəlxalq gündəlikdə duran əsas məsələlərdən birinə çevrilir. Müttəfiqlər, tərəfdaşlar və dost ölkələr kimi Gürcüstan ilə Azərbaycan enerji təhlükəsizliyi işinə böyük töhfə verirlər. Başladığımız layihələr uğurla həyata keçirilib. İndi isə, gündəlikdə daha geniş əməkdaşlığı nəzərdə tutan yeni layihələr var. Hazırda biz Odessa-Brodı-Qdansk layihəsi üzərində Polşa, Ukrayna və Litvada olan dostlarımızla birgə işləyirik.
Əminəm ki, irəli sürdüyümüz təşəbbüslər sayəsində bir çox ölkələr əhatə olunacaqdır. Beləliklə, regional əməkdaşlıq regionlar arasında tərəfdaşlığı daha da gücləndirəcəkdir. Bu gün biz artıq bəyan edirik ki, Xəzər dənizi-Qara dəniz-Baltik dənizi regionu enerji təhlükəsizliyinin, nəqletmə marşrutlarının, yeni dəhlizlərin, xalqlar və ölkələr arasında əlaqələrin təşviq olunmasında səylərini birləşdirir. Bu, müxtəlif regionda yerləşən ölkələrin birləşməsini nümayiş etdirən əla nümunədir.
GUAM bu əməkdaşlıq üçün çox münasib formatdır. Mən GUAM-ın gələcəyinə inanıram. Əminəm ki, Gürcüstanın təşkilatdakı sədrliyi çox uğurlu olacaq. Gələn birillik dövr ərzində nailiyyətlərimiz daha çox olacaq və bunun nəticəsində tərəfdaşlıq və əməkdaşlığımız güclənəcəkdir.
Mən bütün gürcü xalqına dərin dostluq və qardaşlıq hisslərimi ifadə etmək istəyirəm. Xalqlarımız arasında olan münasibətlərin böyük tarixi var. Bu, dostluq və əməkdaşlıq tarixidir. Biz xoşbəxtik ki, bizim nəsil müstəqil ölkələrdə yaşayır. Əsrlər boyu ata-babalarımız xalqlarımızı müstəqil görmək arzusu ilə yaşayıblar, buna çalışıblar. İndi isə, biz bunu görürük. Hazırda biz həmin müstəqilliyimizi və tərəfdaşlığımızı möhkəmləndirmək üçün çalışmalıyıq.
Mən dostum Mixeil Saakaşviliyə qonaqpərvərliyə və əla təşkilatçılıq işlərinə görə bir daha minnətdarlığımı bildirmək istəyirəm. Çox şadam ki, bu zirvə görüşü böyük uğurla nəticələndi və gələcəkdə bir çox görüşləri səmimiyyətlə arzulayıram.
Təşəkkür edirəm.
X X X
Mətbuat konfransında Polşa Prezidenti Lex KAÇİNSKİ çıxış edərək GUAM-la əməkdaşlığın ölkəsi üçün böyük önəm daşıdığını qeyd etdi, enerji sahəsində əməkdaşlığın əhəmiyyətini vurğuladı. GUAM dövlətlərinin Avropa strukturlarına inteqrasiyasını dəstəklədiyini bildirdi, iqtisadi əlaqələrin inkişafına tərəfdar olduğunu söylədi. Polşa Prezidenti qeyd etdi ki, onun ölkəsi GUAM dövlətlərinin ərazi bütövlüyünü dəstəkləyir. Bu ölkələrin ərazi bütövlüyünün pozulması yolverilməzdir.
Litva Prezidenti Valdas ADAMKUS çıxış edərək GUAM-ın əməkdaşlıq baxımından əhəmiyyətini vurğuladı, müasir dövrdə münaqişələrin, dövlətin ərazisinin güc yolu ilə tutulmasının yolverilməz olduğunu bildirdi. V.Adamkus münaqişələrin həllinin regionun daha da çiçəklənməsinə və inkişafına şərait yaradacağını qeyd etdi.
Sonda GUAM-ın baş katibi Valeri ÇEÇELAŞVİLİ bəyanatla çıxış etdi. O, Azərbaycanın sədrliyi dövründə GUAM-ın xeyli inkişaf etdiyini, fəaliyyətinin genişləndiyini bildirdi.
Bölmənin digər xəbərləri
