AZƏRBAYCAN PREZİDENTİ İLHAM ƏLİYEVİN BƏYANATI
-Hörmətli Viktor Andreyeviç,
hörmətli qonaqlar,
xanımlar və cənablar!
Ukrayna Prezidenti başda olmaqla bu ölkənin nümayəndə heyətini Azərbaycanda bir daha səmimi salamlamaq istəyirəm. Mən Ukrayna Prezidentinin Azərbaycana səfərinin nəticələrindən, aparılmış danışıqlardan, fikir mübadiləsindən çox razıyam. Biz qarşılıqlı maraq doğuran məsələlər barədə çox geniş fikir mübadiləsi apardıq. Ölkələrimiz arasında müxtəlif sahələrdə münasibətlər dərindən təhlil edildi. Biz regional problemlərə toxunduq, regional əməkdaşlıq məsələlərini, Avropa İttifaqı çərçivəsində nəzərdə tutulan “Şərq tərəfdaşlığı” layihəsi üzrə əməkdaşlığın perspektivlərini geniş müzakirə etdik.
Bu gün Prezidentlər Şurasının ilk iclası keçirildi. Biz əsas diqqəti qarşılıqlı siyasi əlaqələr, iqtisadi əməkdaşlıq, energetika, nəqliyyat sahələrində və hərbi-texniki əməkdaşlıq məsələləri üzərində cəmləşdirdik. Bütün diskussiyalarda və fikir mübadilələrində biz vahid mövqedən çıxış edirdik. Ən başlıcası odur ki, ölkələrimiz arasında strateji tərəfdaşlıq uğurla davam edir. Bu münasibətlər Azərbaycanın milli maraqlarına uyğundur və biz Ukraynanı dünyada ən etibarlı tərəfdaşlarımızdan biri hesab edirik. Biz beynəlxalq təşkilatlarda, o cümlədən Birləşmiş Millətlər Təşkilatında hiss etdiyimiz dəstəyə görə şəxsən Ukrayna Prezidentinə və Ukrayna dövlətinə minnətdarıq. Keçən il, düz bir il bundan əvvəl Azərbaycanın işğal olunmuş ərazilərində vəziyyət haqqında məsələyə dair səsvermə zamanı Ukraynanın nümayiş etdirdiyi prinsipial, ədalətli mövqe bütün Azərbaycan xalqında dərin minnətdarlıq hissi doğurur.
Artıq qeyd etdiyim kimi, bu gün biz təkcə ölkələrimiz üçün deyil, əminəm ki, həm də region üçün, Avropa üçün əhəmiyyətli məsələləri və nəqliyyat sahəsində, Xəzərin enerji ehtiyatlarının beynəlxalq bazarlara çıxarılması, enerji daşıyıcıları nəqlinin şaxələndirilməsi sahəsində nəzərdə tutduğumuz məsələləri, bu istiqamətdə Ukraynanın və Azərbaycanın rolunu hərtərəfli müzakirə etdik. Bütün bu məsələlər çox ciddi diqqət yetirilməsini tələb edir. Bizim iştirakımızla, Ukrayna və Azərbaycan prezidentlərinin və dost ölkələrdən olan həmkarlarımızın iştirakı ilə enerji sammitləri keçirilmişdir. Bunlardan axırıncısı, ötən ilin noyabrında Bakıda keçirilmiş zirvə görüşü bir daha nümayiş etdirdi ki, biz enerji sahəsində geniş əməkdaşlığa sadiqik. Bakı sammitinin və Bakı Bəyannaməsinin nəticələri - indi regionda, praktik olaraq, bütün enerji layihələri üçün, yəni həm mövcud layihələrin, həm də birgə səylərimizlə həyata keçirilməli layihələr üçün təməldir.
Bu gün mən ölkələrimiz arasında əməkdaşlıq ruhunu da vurğulamaq istərdim. Bəli, biz siyasi və iqtisadi maraq doğuran, bütövlükdə regional vəziyyətdə öz əksini tapacaq mühüm məsələləri müzakirə etdik. Çox əhəmiyyətlidir ki, bu müzakirələr olduqca dostluq şəraitində, qarşılıqlı anlaşma və qarşılıqlı dəstək şəraitində keçmişdir. Bizim münasibətlərimizdə heç də az əhəmiyyəti olmayan sahəni - humanitar əməkdaşlıq məsələsini də qeyd etmək istərdim. Biz buna çox diqqət yetiririk və bu əməkdaşlığın yaxşı nəticələri vardır. Viktor Andreyeviçin Azərbaycana, demək olar ki, hər bir səfərində bu istiqamətdə tərəqqi olduğunu vurğulayır və çox mühüm tədbirlərdə birgə iştirak edirik.
Mən bizim dəvətimizi qəbul edərək yenidən buraya səfər etdiyinə görə Ukrayna Prezidentinə bir daha təşəkkürümü bildirmək, aparılmış danışıqlardan məmnunluğumu ifadə etmək və ümidvar olduğumu bildirmək istərdim ki, bizim müzakirə etdiyimiz və razılığa gəldiyimiz bütün məsələlər, əvvəlki illərdə olduğu kimi, dəqiq yerinə yetiriləcəkdir. Biz nəzərdə tutduqlarımızın hamısını yerinə yetirmişik. Bir daha xoş gəlmisiniz və ümid edirəm ki, Azərbaycan torpağında olmağınız Sizə çox xoş təsir bağışlayacaqdır.
######
Bölmənin digər xəbərləri
