Çempionlar Liqasında tarixi hesab qeydə alınıb
Bakı, 15 oktyabr, AZƏRTAC
UEFA Çempionlar Liqasının liqa mərhələsinin II turu çərçivəsində Avstriyada LASK və İngiltərə “Liverpul”u arasında oyun tarixi nəticə ilə əlamətdar olub.
AZƏRTAC “MisterChip” statistika portalına istinadən xəbər verir ki, qarşılaşma ev sahibi komandanın 3:6 hesablı məğlubiyyəti ilə başa çatıb. Çempionlar Liqası tarixində ilk dəfə hansısa oyun bu hesabla yekunlaşıb. Daha əvvəl iki qarşılaşmada meydan sahibləri 6:3 hesabı ilə qalib gəlsələr də, turnir tarixində ev sahibi komandanın 3:6 hesablı məğlubiyyəti qeydə alınmayıb.
Çempionlar Liqası 1992-ci ilədək Avropa Çempion Klublar Kuboku adlanırdı. Həmin turnirin tarixində 3:6 hesabı ilə başa çatan sonuncu qarşılaşma 1983-cü il oktyabrın 19-da keçirilib. Həmin vaxt 1/8 final mərhələsində Macarıstanın “Dyor” və Belarusun “Dinamo Minsk” komandaları qarşılaşıb.
LASK – “Liverpul” matçı daha bir neçə qeyri-adi göstərici ilə yadda qalıb. Belə ki, Çempionlar Liqası tarixində ilk dəfə bir komandanın futbolçusu het-trik etdiyi halda, rəqib komandanın oyunçusu eyni qarşılaşmada üç məhsuldar ötürmə ilə yadda qalıb. Bu göstəricilərə müvafiq olaraq, “Liverpul”dan Bredli Barkolya və LASK-dan isə İvan Dibanqo imza atıblar.
Bundan başqa, Dibanqo Çempionlar Liqası tarixində komandasının məğlub olduğu matçda üç məhsuldar ötürmə verən ilk futbolçu kimi tarixə düşüb.
Bölmənin digər xəbərləri
