AZƏRBAYCAN PREZİDENTİ İLHAM ƏLİYEVİN ÇIXIŞI
Azərbaycan iqtisadiyyatın inkişafı sahəsində böyük addımlar atmışdır. Biz ölkəmizdə siyasi, sosial və iqtisadi islahatlar keçiririk. Azərbaycandakı vəziyyət hər il yaxşılığa doğru dəyişir. Biz enerjidaşıyıcılarının inkişafı, nəqli məsələlərini, həm də Avropa Birliyi ilə Azərbaycan arasında münasibətləri və əlbəttə ki, Ermənistan–Azərbaycan, Dağlıq Qarabağ münaqişəsi üzrə məsələləri müzakirə etdik. Əsas müzakirə mövzularının biri elə bu idi. Azərbaycan münaqişənin sülh yolu ilə həll olunması siyasətini davam etdirmək niyyətindədir. Amma eyni zamanda, bu həll yolu beynəlxalq hüququn hamı tərəfindən tanınmış və qəbul olunmuş prinsiplərinə əsaslanmalıdır. Azərbaycanın ərazi bütövlüyü və suverenliyi bərpa olunmalıdır. Minsk qrupunun münaqişəni həll etməkdə vasitəçilik mandatı var, biz bu qrupun daha fəal iştirakına ümid bəsləyirik. Ümid edirik ki, Minsk qrupu məsələnin həlli yolunun axtarılmasını davam etdirəcəkdir. Amma eyni zamanda, Azərbaycan digər Avropa qurumlarının və ilk növbədə, Avropa Birliyinin bu məsələdə daha fəal mövqe tutacağına da ümid bəsləyir. Biz özümüzü Avropanın bir hissəsi hesab ediriksə, həm Azərbaycan, həm də Ermənistan bu yeni “qonşuluq siyasəti”nin çərçivəsindədirsə, bir ölkənin digər ölkənin ərazilərini işğal etməsinə son qoyulmalıdır. Bu, Avropa ailəsinə xas olan davranış tərzi deyildir. Hər bir ölkə digər ölkələrin ərazi bütövlüyünü tanımalıdır. Əlbəttə ki, Ermənistan qoşunlarının işğal olunmuş ərazilərdən dərhal çıxarılması məsələnin sülh yolu ilə həllinin əsas şərtlərindən biridir. Bir daha Avropaya inteqrasiya siyasətimizi təsdiq etmək istəyirəm. Ümidvaram ki, Avropanın bütün ölkələrinin naminə münasibətlərimiz gələcəkdə davam etdiriləcəkdir.
Sağ olun!
X X X
Sonra jurnalistlərin suallarına cavab verildi.
SUAL: Nəyə görə Avropa Birliyi Cənubi Qafqazda mövcud olan separatizmə diqqət yetirmir? Avropa Birliyi Dağlıq Qarabağ məsələsinin həllində hansı rolu oynaya bilər?
ROMANO PRODİ: Biz bu məsələni sadədən mürəkkəbədək ətraflı müzakirə etmişik. Belə münaqişənin mövcudluğundan təəssüflənirik. Ümumiyyətlə, “qonşuluq siyasəti”ndə bu 3 ölkəni görmək istəməyimiz o deməkdir ki, onların arasında münaqişə olmasını istəmirik. Nəyi bacarırıqsa edəcəyik ki, münaqişələr həll olunsun. Bu işlə məşğul olan xüsusi qrup var - Minsk qrupu. Biz istəməzdik ki, onların işinə qarışaq. Onları narahat etmək istəmirik, amma təzyiq edəcəyik. Çünki neçə ildir ki, bu işlə məşğul olurlar, amma nəticə yoxdur. Avropa Birliyi məsələnin həllini təcili hesab edir. Əgər bizdən xahiş olunarsa, bizə müraciət edilərsə, biz sizin ixtiyarınızdayıq. Əlbəttə ki, bizə məsələnin həllini sürətləndirməklə bağlı müraciət olunarsa.
SUAL: Cənab Prodi, Sizin iştirakınızla bağlı kim müraciət etməlidir? Ermənistan və Azərbaycanın “qonşuluq siyasəti”nə cəlb olunmasından əvvəl Dağlıq Qarabağ məsələsinin sülh yolu ilə həll edilməsi ilə bağlı Prezident İlham Əliyevin bəyanatına münasibətiniz necədir?
Prezident Əliyev, Dağlıq Qarabağla bağlı son görüşlərdən sonra atılacaq addımlar necə olacaq?
ROMANO PRODİ: Biz detallara varmamışıq. Amma arzumuzu ifadə etmişəm ki, hər iki ölkənin sərəncamındayıq və kömək edə bilərik. Bu mərhələdə müsbət təklif verə bilmirik. Sadəcə, tərəfləri razılığa çağırırıq və deyirik ki, müraciət olunarsa, ixtiyarınızdayıq. Elə bilirəm ki, bunun özü elə bizim tərəfimizdən müsbət addımdır. Münaqişədə olan ölkələrin siyasi müstəqilliyinə və seçiminə göstərdiyimiz hörmətdir.
İLHAM ƏLİYEV: Mən elə bilirəm ki, sülh dialoqunun davam etdirilməsi üçün Ermənistan və Azərbaycanın xarici işlər nazirlərinin görüşləri vacibdir. Dialoqun davamı yaxşı göstəricidir. Amma eyni zamanda, biz həmişə deyirik ki, danışıqlar yalnız danışıq obyekti ola biləcək halda aparıla bilər. Gündəlikdə müzakirə olunacaq mövzu yoxdursa, biz düşünmürük ki, yalnız danışıqlar xatirinə və yaxud da danışıqlar görüntüsü yaratmaq xatirinə danışıqları davam etdirmək lazımdır. Əgər müzakirə olunacaq məsələ varsa, danışıqlar prosesində olacağıq. Mən elə düşünürəm ki, xarici işlər nazirlərinin görüşləri mövzunu geniş səpkidə müzakirə etməyə imkan verir. Biz belə fikirdəyik ki, görüşlər davam etdirilməlidir və ümidvarıq ki, bu görüşlər nəticə verəcəkdir.
SUAL: Cənab Əliyevə sual. Cənab Prodi dedi ki, siz xahiş etsəniz Avropa Birliyi məsələ ilə məşğul olacaqdır. Nə zaman xahiş edəcəksiniz?
İLHAM ƏLİYEV: Biz artıq müraciət etmişik. Bugünkü görüş zamanı bir daha müraciət etdik. Əlbəttə, hamımız anlamalıyıq ki, Minsk qrupunun ATƏT-dən mandatı var və heç kim bu mandatı şübhə altına almır. Minsk qrupu məsələnin sülh yolu ilə həll olunması üçün mümkün yol axtarır. Eyni zamanda, biz düşünürük ki, Avropa qurumları, Avropa təşkilatları, - Avropa Birliyi, Avropa Şurası, habelə Avropa ictimai rəyi də prosesə qatıla, sülh yolu ilə həll tapmaq imkanlarına təsir edə bilər. Biz heç də nəzərdə tutmuruq ki, hansısa ölkə və yaxud da qurum Minsk qrupuna alternativ olacaqdır. Biz bu məsələyə geniş beynəlxalq diqqət ayrılmasını istəyirik. Sağ olun!
Bölmənin digər xəbərləri
