AZƏRBAYCAN PREZİDENTİ İLHAM ƏLİYEVİN ÇIXIŞI
Əziz bacılar və qardaşlar!
Mən sizin hamınızı ürəkdən salamlayıram. Burada mənim ünvanıma deyilən bütün xoş sözlərə görə sizə öz təşəkkürümü bildirirəm.
Bu şəkil doğrudan da gözəl xatirədir. Bu şəkil xalqımızın ümummilli lideri Heydər Əliyevin 20 il əvvəl Siyəzənə gəlişini əks etdirir. Burada, onun arxasında mən özümü görürəm. Bu, bir növ rəmzi məna daşıyır. Mən seçkilərdən əvvəl Siyəzəndə olarkən, seçicilərlə görüşərkən demişdim ki, əgər mənə etimad göstərilərsə, Heydər Əliyevin yolunu davam etdirəcəyəm. İndi bu yolu davam etdirirəm. Bu şəkil də, bir növ, onun təzahürüdür ki, Heydər Əliyevin siyasəti yaşayır, davam edir. 20 ildən sonra biz məhz həmin yerdə yenə görüşürük.
Azərbaycan 20 il bundan əvvəl də uğurla inkişaf edirdi və bu gün də uğurla inkişaf edir. O vaxt başqa bir ictimai-siyasi quruluş idi, Azərbaycan müstəqil dövlət deyildi. Əlbəttə, öz siyasətini mövcud olan quruluşa uyğunlaşdırmalı idi. Amma buna baxmayaraq, xalqımızın lideri Heydər Əliyev o dövrdə də Azərbaycanın hərtərəfli inkişafı üçün böyük xidmətlər göstərmişdir. Azərbaycanda güclü sənaye potensialı məhz o illərdə yaranmışdır.
O cümlədən neft sənayesində. Siyəzən də neftçilər şəhəridir. Burada böyük mədənlər var, böyük işlər görülübdür. Bu gün Azərbaycan müstəqil dövlət kimi yaşayır, müstəqil dövlət kimi bütün sahələrdə öz siyasətini tam sərbəst, azad şəkildə həyata keçirir.
Mən bizim oktyabr ayındakı görüşümüzü bir daha xatırlatmaq istəyirəm. Siz mənə etimad göstərdiniz, mənə səs verdiniz. Seçkidən keçən dövr ərzində bütün verdiyim vədlər öz həllini tapır. Atılan bütün addımlar Azərbaycan xalqının gələcəyi naminədir. Müxtəlif proqramlar qəbul edilibdir, regional inkişaf proqramı həyata keçirilir. Mənim də regionlara səfərlərim bu proqramların icrası ilə bağlıdır. Bir var ki, proqramı qəbul edəsən, gözəl qərarlar qəbul edəsən, bir də var ki, onun icrası uğurla getsin. Məni ən çox maraqlandıran məhz ikinci cəhətdir. Görürəm ki, bu proqramlar öz həllini tapır.
Regionların inkişafına dair proqramın əsas istiqamətlərindən biri də yeni iş yerlərinin açılmasıdır və bu proses də uğurla gedir. Mənə indi məlumat verildi ki, Siyəzən rayonunda da bu istiqamətdə çox uğurlu addımlar atılıbdır. Burada seçkilərdən əvvəl açılmış kərpic zavodu da fəaliyyət göstərir. Ümid edirəm ki, bundan sonra yeni müəssisələr yaranacaq, insanlarımız işlə təmin olunacaqlar. Sosial məsələlər öz həllini tapacaqdır.
Sizə deyə bilərəm ki, seçkidən keçmiş dövr ərzində bütün istiqamətlərdə uğurlar var. Biz düz yoldayıq, ölkəmizi düzgün istiqamətdə inkişaf etdiririk. Beynəlxalq aləmdə Azərbaycan öz yerini gücləndirir, möhkəmləndirir. Mən heç şübhə etmirəm ki, biz gələcəkdə qarşımızda duran bütün məqsədlərə nail olacağıq, ölkəmizi gücləndirəcək, hərtərəfli inkişaf etdirəcəyik. Mən bu yolda sizin hamınıza uğurlar arzulayıram, cansağlığı, xoşbəxtlik diləyirəm. Sağ olun.
Bölmənin digər xəbərləri
