RƏSMİ XRONİKA
AZƏRBAYCAN PREZİDENTİ İLHAM ƏLİYEVİN ÇIXIŞI
![AZƏRBAYCAN PREZİDENTİ İLHAM ƏLİYEVİN ÇIXIŞI](/files/2008/2/1200x630/14864535582146142293_1200x630.jpg)
![](/media/newsimages/2008/May/file1212252150538.jpg)
Xanımlar və cənablar!
Parlamentdə belə bir səmimi qəbula görə sizə təşəkkür edirəm. Burada olmağımdan çox şadam. Bu gün Azərbaycan Respublikası Prezidentinin Finlandiyaya ilk rəsmi səfəri həyata keçir və bu, ölkələrimiz arasındakı əlaqələrin tarixində mühüm hadisədir.
Biz öz müstəqilliyimizi 1991-ci ildə bərpa etdik və o zamandan bəri bu, Finlandiyaya ilk rəsmi səfərdir. Çox uğurlu səfərdir, bu gün səhər biz xanım Prezidentlə ətraflı danışıqlar apardıq. Biz ikitərəfli əlaqələri, regional məsələləri, enerji siyasətini, siyasi və iqtisadi islahatlar siyasətini müzakirə etdik. Bizim baxışlarımız və yanaşmalarımız üst-üstə düşür.
Bizim demokratik respublikanın ildönümü ilə bağlı təbriklərinizə görə Sizə təşəkkür edirəm. Bu, bizim yaşadığımız bölgə üçün tarixi hadisə olub və ümumiyyətlə, müsəlman dünyasında yaranan ilk demokratik respublika idi. Lakin sonradan uzun illər ölkəmiz müstəqillikdən məhrum olmuşdur. Çünki demokratik respublika cəmi iki il yaşadı. Sonra biz yenidən digər ölkənin bir hissəsinə çevrildik. Biz indiki müstəqilliyimizi çox əziz tuturuq və onun daha da möhkəmləndirilməsi üçün əlimizdən gələni edirik.
Biz Avropaya inteqrasiya edirik. Avropa İttifaqı ilə Azərbaycanın tərəfdaşlığı genişlənməkdədir. Biz Avropa İttifaqının Yeni qonşuluq siyasətinin iştirakçısıyıq. Tərəfdaşlığı və əməkdaşlığı gücləndirmək məqsədi ilə biz Avropa İttifaqı və üzv ölkələrlə ikitərəfli və çoxtərəfli əsaslarla əməkdaşlıq edirik. Bu gün bunları inkişaf etdirmək üçün böyük imkanların olduğunu görürük. Siyasi əlaqələrimiz çox yaxşı səviyyədədir və iqtisadi sahədə yeni imkanlar mövcuddur. Siz bizim iqtisadi inkişafımızı qeyd etdiniz. Bu, bizim üçün böyük nailiyyətdir. Son üç il ərzində ölkəmiz ÜDM-in artımına görə dünyada liderlik edir və ötən 4 il ərzində bizim iqtisadiyyatımız ikiqat artıbdır. Şübhəsiz ki, bu, böyük bir uğurdur. İndi ölkəni müasirləşdirmək üçün böyük imkanlarımız var və eyni zamanda, üzərimizə böyük məsuliyyət düşür. Buna görə də Azərbaycanda siyasi, iqtisadi islahatlar, demokratik proseslər və sosial proqramlar paralel şəkildə aparılır. Vətəndaşlarının istedadı və müasir islahatlar sayəsində böyük nailiyyətlər əldə edən bir ölkə nümunəsi olmaq bizim üçün çox əhəmiyyətlidir.
Bu gün biz xanım Prezidentlə Finlandiyanın heç bir enerji resursları olmadan inkişaf etməsi və həyat səviyyəsi, azadlıq və sosial rifah baxımından dünyanın ən aparıcı ölkələrindən birinə çevrildiyi haqda müzakirələr apardıq. Bizə əlavə dəstək verən enerji resurslarımızın olduğunu nəzərə alsaq, güclü ictimai nəzarətin və hər bir vətəndaşın bərabər imkanlarının mövcud olduğu demokratik və müasir ölkəyə çevrilmək üçün bütün imkanlarımız var və biz bu istiqamətdə fəaliyyət göstəririk.
Bizim Finlandiya ilə ikitərəfli münasibətlərimiz iqtisadi maraqlar və birgə layihələrlə məhdudlaşmır. Biz, əslində, daha geniş mənada, Xəzər və Baltik regionları arasında əməkdaşlığa cəlb olunmaq istəyirik. Artıq indi bu istiqamətdə ilk addımlar atılmaqdadır. Azərbaycan etibarlı tərəfdaş və dost ölkə kimi regionlarımız arasında tərəfdaşlığa töhfə vermək üçün əlindən gələni edəcəkdir.
Bu gün Şəhər Şurasında olarkən mən qeyd etdim ki, Helsinki və Bakı gözəl dəniz sahilində yerləşən paytaxt şəhərlərdir və bu da şəhərlərimiz arasında olan oxşarlıqdır. Bir çox digər oxşarlıqlar da var və biz bu oxşarlıqların davam etməsini istəyirik. Azərbaycan demokratik və sosial tərəqqi baxımından gələcəkdə inkişaf etmiş ölkələrin səviyyəsinə çatacaqdır. Biz özümüzü gələcəkdə inkişaf etmiş bir ölkə kimi görürük və bu səbəbdən sizin təcrübənizi və nailiyyətlərinizi öyrənmək və ölkəmizdə daha nə edə biləcəyimizi görmək bizim üçün çox maraqlıdır.
Parlamentdə olmaq imkanına görə Sizə minnətdarlığımı bildirmək istəyirəm. Sizə uğurlar arzulayıram və əminəm ki, bu səfərdən sonra əlaqələrimiz uğurla və sürətlə inkişaf edəcəkdir.
Sağ olun.
X X X
Görüşdən sonra dövlətimizin başçısı parlamentin binası ilə yaxından tanış oldu, parlamentin iclasını izlədi. Deputatlar Prezident İlham Əliyevi hərarətlə salamladılar.
######
![]() |
![]() |