RƏSMİ XRONİKA
AZƏRBAYCAN PREZİDENTİ İLHAM ƏLİYEVİN NİTQİ
-Hörmətli xanım Prezident!
Hörmətli cənab Pentti Arayarvi!
Hörmətli xanımlar və cənablar!
Xanım Prezident, ilk növbədə, məni Finlandiyaya rəsmi səfərə dəvət etdiyinizə görə Sizə təşəkkür edirəm. Finlandiya torpağında mənə və nümayəndə heyətinə göstərdiyiniz qonaqpərvərliyə görə minnətdarlığımı bildirmək istəyirəm.
Bu, Azərbaycan Prezidentinin Finlandiyaya ilk rəsmi səfəridir. İnanıram ki, bu səfər ölkələrimiz arasında münasibətlərin inkişafında mühüm rol oynayacaqdır. Keçirdiyimiz görüşlər, apardığımız danışıqlar əlaqələrimizin genişlənməsinə və dərinləşməsinə öz töhfəsini verəcəkdir.
Finlandiya ilə Azərbaycan arasında keçmişdə də yaxşı əlaqələr olmuşdur. Keçən əsrin əvvəllərində Bakıda yaşayan finlandiyalılar Azərbaycanın neft sənayesinin inkişafında fəal rol oynamışlar. Finlandiyanın keçmiş rəhbərləri Urho Kekkonen və Mauno Koyvisto müxtəlif vaxtlarda Azərbaycana səfər etmişlər.
Ötən əsrdə xalqlarımız arasında ədəbiyyat, incəsənət və musiqi sahələrində zəngin mədəni mübadilələr olmuşdur. Finlandiyada “Azərbaycan-Finlandiya Mədəniyyət Körpüsü” Cəmiyyəti Azərbaycan mədəniyyətinin təbliği, Azərbaycan haqqında məlumatların Finlandiya ictimaiyyətinə çatdırılmasında səmərəli fəaliyyət göstərir.
Xanım Prezident, 2005-ci ilin sentyabrında Sizin Azərbaycana səfəriniz əlaqələrimizin inkişafında yeni səhifə açmışdır. Bu gün Finlandiya şirkətləri, finlandiyalı iş adamları ölkəmizdə elektrik stansiyalarının və buxar-qaz qurğularının tikintisini həyata keçirirlər. Mən beynəlxalq və regional təşkilatlar, o cümlədən Avropa İttifaqının Yeni qonşuluq siyasəti proqramı çərçivəsində əlaqələrimizə xüsusi önəm verirəm.
Son illərdə irimiqyaslı beynəlxalq layihələrin, xüsusən Böyük İpək yolunun bərpası, Avropa-Qafqaz-Asiya nəqliyyat dəhlizinin yaradılması istiqamətində əməkdaşlığımız böyük əhəmiyyət daşıyır. Bu əməkdaşlıq Baltik dənizi, Qara dəniz və Xəzər dənizi regionları ölkələrinin inteqrasiyasına, eləcə də Avropa İttifaqı ilə Azərbaycan arasında tərəfdaşlığa öz töhfəsini verir.
Azərbaycan Avropa İttifaqı ilə Enerji məsələləri üzrə strateji tərəfdaşlığa dair memorandum imzalayaraq, neft və qaz layihələrini həyata keçirərək və Bakı-Tbilisi-Ceyhan neft boru kəməri, Bakı-Tbilisi-Ərzurum qaz boru kəməri və digər boru kəmərləri vasitəsilə Avropa və beynəlxalq bazarlara öz enerji məhsullarını çatdırmaqla enerji təhlükəsizliyinə mühüm töhfə verir.
Azərbaycan son illər ərzində sürətli inkişaf yolu keçmiş və iqtisadi baxımdan regionun lider dövlətinə çevrilmişdir. Keçən il Azərbaycanda ÜDM-in artımı 25 faiz olmuşdur. Son 4 il ərzində ölkə iqtisadiyyatı təxminən 2 dəfə artmışdır. Ölkədə, əsasən regionlarda 660 mindən çox yeni iş yerləri açılmışdır ki, biz şaxələndirilmiş iqtisadiyyat haqqında danışaq. Bizim məqsədimiz güclü qeyri-neft iqtisadiyyatı yaratmaqdan ibarətdir ki, gələcək nəsillər neft və neft qiymətlərindən asılı olmasınlar.
Ölkəmizdə xarici sərmayələrin cəlb edilməsi üçün əlverişli şərait yaradılmışdır. Biz adambaşına düşən birbaşa xarici sərmayələrin həcminə görə regionda lider ölkəyik. Son illər ərzində ölkə iqtisadiyyatına 40 milyard ABŞ dollarından çox sərmayə qoyulmuşdur.
Azərbaycan regionda təhlükəsizliyin, sabitliyin və beynəlxalq əməkdaşlığın inkişafında mühüm rol oynayır. Lakin artıq 20 ilə yaxındır ki, Azərbaycan Ermənistanın hərbi təcavüzünə məruz qalmışdır. Ermənistan Azərbaycan ərazisinin 20 faizini işğal etmiş və burada etnik təmizləmə siyasəti aparmışdır. Nəticədə ölkədə bir milyondan çox qaçqın və məcburi köçkün yaranmışdır.
Beynəlxalq ictimaiyyət və təşkilatlar Azərbaycanın ərazi bütövlüyünü tanıyır və münaqişənin ölkəmizin ərazi bütövlüyü çərçivəsində, beynəlxalq hüququn normalarına uyğun olaraq ədalətli şəkildə həllinin tərəfdarıdır. Münaqişə ilə bağlı BMT Təhlükəsizlik Şurasının 4 qətnaməsi, ATƏT, Avropa Şurası Parlament Assambleyası, NATO və digər beynəlxalq təşkilatların müvafiq qərar və qətnamələri var.
Bu yaxınlarda BMT-nin Baş Məclisi Azərbaycanın ərazi bütövlüyünü bir daha təsdiq edən və erməni qüvvələrinin bütün işğal olunmuş ərazilərdən tam şəkildə dərhal çıxarılmasını tələb edən qətnaməni qəbul etmişdir. Bu münaqişə yalnız beynəlxalq hüquq, Azərbaycanın ərazi bütövlüyü çərçivəsində həll olunmalıdır. Biz bu məsələdə hazırda ATƏT-də sədrlik edən Finlandiyanın da dəstəyinə ümid bəsləyirik.
Hörmətli xanım Prezident, Siz bu gün Şəhər Şurasında ziyafət zamanı qeyd etdiniz ki, Helsinki və Bakı şəhəri bir-biri ilə oxşardır. Mən onu da qeyd etmək istəyirəm ki, Sizin işlədiyiniz iqamətgahdan açılan görünüş, demək olar ki, mənim Bakıdakı iqamətgahımdan görünən panorama bənzəyir. Bizim paytaxt şəhərlərimizin dəniz sahilində yerləşməsi böyük üstünlükdür.
Həmçinin bu gün müzakirə etdiyimiz beynəlxalq məsələlərdə yanaşmamız oxşardır. Finlandiya və Azərbaycan, hər ikisi Rusiya imperiyasının dağılması nəticəsində müstəqil oldular. Lakin siz müstəqilliyinizi qoruyub saxlaya və dünyanın ən inkişaf etmiş ölkələrindən birinə çevrilə bildiniz. Əfsuslar olsun ki, bizim müstəqilliyimiz iki il çəkdi. Biz müstəqilliyimizi onilliklər ərzində, yəni 70 il ərzində itirdik. İndi isə müstəqilliyimiz bərpa olunub və biz dünyada gedən proseslərə çatmalıyıq. Ona görə biz insan kapitalına, təhsilə, informasiya texnologiyalarına və müasir texnologiyalara sərmayə qoyuruq. Bütün bunlar müstəqillik dövründə əldə edilmişdir.
Siz təbii sərvətlər olmadan bütün sosial problemləri maksimum səviyyədə həll etmiş, inkişaf etmiş müasir ölkəyə çevrilmək üçün çox yaxşı nümunəsiniz. Bütün beynəlxalq təşkilatların nüfuz cədvəllərində Sizin ölkəniz ilk onluqda gedir. Siz dəyişməyi planlaşdırmaq üçün ölkələrə yaxşı nümunəsiniz. Bizim planlarımız qanunun aliliyi ilə seçilən, çoxlu sosial proqramları olan müasir, demokratik ölkəyə çevrilməkdir və bunun üçün yaxşı imkanlarımız vardır. Bu baxımdan sizin təcrübəniz bizim üçün çox vacibdir. Mənim ölkənizə bu səfərim həm münasibətlərin inkişafı, həm də təcrübə mübadiləsi baxımından əhəmiyyətlidir.
Xanım Prezident, mən bu badəni Sizin, cənab Pentti Arayarvinin sağlığına, Finlandiya xalqının şərəfinə və xalqlarımız arasındakı dostluğun şərəfinə qaldırmaq istəyirəm.
X X X
Qəbulda Azərbaycanın və Finlandiyanın dövlət himnləri səsləndirildi.
######