AZƏRBAYCAN PREZİDENTİ İLHAM ƏLİYEVİN VƏ YUNANISTAN PREZİDENTİ KONSTANTİNOS STEFANOPULOSUN GENİŞ TƏRKİBDƏ GÖRÜŞÜ
Təkbətək görüş başa çatdıqdan sonra Azərbaycan Prezidenti İlham Əliyevin və Yunanıstan Prezidenti Konstantinos Stefanopulosun nümayəndə heyətlərinin iştirakı ilə geniş tərkibdə görüşü keçirilmişdir.
Azərbaycan Prezidenti İLHAM ƏLİYEV görüşü açaraq dedi:
- Hörmətli cənab Prezident!Hörmətli qonaqlar!Mən sizin hamınızı ürəkdən salamlayıram, “Azərbaycana xoş gəlmisiniz!” deyirəm.
Yunanıstanla Azərbaycan arasında münasibətlər çox sürətlə inkişaf edir. Biz çox istəyirik ki, bu münasibətlər bütün sahələri əhatə etsin. Biz bu gün sizinlə təkbətək görüşdə bu məsələni müzakirə etdik. Biz çox istəyirik ki, aramızda siyasi dialoq daha da güclənsin. İqtisadi sahədə çoxlu layihələr var, çoxlu imkanlar var. Mən ümidvaram ki, iqtisadi əlaqələrimiz bundan sonra da güclənəcəkdir.
Biz çox şadıq ki, sizinlə bərabər, Azərbaycana Yunanıstan iş adamlarının böyük bir qrupu gəlibdir və onlar çox səmərəli görüşlər keçirirlər. Humanitar sahədə əlaqələrimiz də çox uğurla inkişaf edir. Bakı Slavyan Universitetində yunan bölməsi fəaliyyət göstərir və ona çox böyük maraq vardır.
Bildiyiniz kimi, enerji sektorunda da uğurlu əməkdaşlıq gedir. Biz bu istiqamətdə ilkin addımları atmışıq. Ümid edirəm ki, gələcəkdə Yunanıstanla Azərbaycan arasında enerji sahəsində əməkdaşlıq daha da yüksək pilləyə qalxacaqdır. Mən sizi bir daha salamlayır və əmin olduğumu bildirmək istəyirəm ki, bu səfərdən sonra bütün sahələrdə əlaqələrimiz daha da inkişaf edəcəkdir. Sonra Yunanıstan Prezidenti KONSTANTİNOS STEFANOPULOS çıxış edərək dedi:
- Cənab Prezident, təşəkkür edirəm.Mətbuat nümayəndələrinin burada olmasından istifadə edərək, Sizi əmin etmək istəyirik ki, biz bu səfərə böyük əhəmiyyət veririk. İcazə verin, Sizin atanızın əziz xatirəsinə ehtiramımı bildirim. Mən onunla iki dəfə görüşmüşəm və regionda mühüm əhəmiyyət kəsb edən bir çox məsələlər ətrafında, o cümlədən ölkənizin problemləri ilə bağlı fikir mübadiləsi aparmışıq.
Bu gün biz iki ölkə arasında mümkün əməkdaşlıq imkanlarını araşdıracağıq. Ölkəmiz enerji sektoruna maraq göstərir və biz Azərbaycanda təbii qaz yataqlarının səmərəli istifadə olunmasına ümid bəsləyirik. Düşünürük ki, Azərbaycanın təbii qazının digər ölkələrə çatdırılmasında hansı yollarla, vasitələrlə iştirak edə bilərik.
Biz ticarət əlaqələrinin genişlənməsində də çox maraqlıyıq. Mənimlə Bakıya çoxsaylı biznesmenlər gəlmişdir. Biznesmenlərin Bakıya gəlişi də bu istəyi bir daha təsdiq edir. İnanıram ki, ikigünlük iqtisadi forum da uğurlu, səmərəli olacaqdır. Mən sabah forumun nəticələrinin müzakirəsinə dəvət almışam və əminəm ki, bu forum ölkələrimiz arasında əlaqələrdə tərəqqiyə yeni yol açacaqdır.
Yunanıstan böyük mədəniyyətə malik olan bir ölkədir. Biz istəyirik Sizinlə mədəni əlaqələrimizi, o cümlədən elm ocaqları, universitetlərimiz və alimlərimiz arasında əlaqələri genişləndirək. Mən Bakı Slavyan Universitetinə dəvət olunmağımdan və mənə universitetin fəxri doktoru adı verilməsindən və Yunan Araşdırmalar Mərkəzinin açılmasından çox məmnunam.
İcazə verin, Ermənistan-Azərbaycan, Dağlıq Qarabağ münaqişəsi ilə bağlı bölüşdüyümüz fikirlərə bir daha qayıdım. Ölkəmizin təcrübəsindən çıxış edərək, biz bu problemi tam dərk edirik. Çünki bizim ölkə də eyni problemlə üzləşmişdir. Məlum çətinliklərə baxmayaraq, tərəflərin səmimi istəyi, səyi və beynəlxalq təşkilatların köməyi ilə problemin tezliklə həll yolunu tapacağına inanmaq istərdik. Cənab Prezident, Yunanıstan Avropa təşkilatları çərçivəsində bütün mümkün vasitələrdən istifadə edəcəkdir ki, Avropada olan münaqişələrin həllində daha fəal rol oynasın. Cənab Prezident, sonda icazə verin, səmimi qonaqpərvərliyinizə görə Sizə təşəkkürümü bildirim. Sizi ölkəmizə rəsmi səfərə dəvət etmək istərdim. Səfərin vaxtı, əlbəttə, diplomatik kanallar vasitəsilə müəyyən olunacaqdır. Bir daha inanmaq istərdim ki, bu gün biz səmərə verəcək əhəmiyyətli səylərin təməlini qoyuruq.
X X X
Görüşdə ikitərəfli və regional problemlərə dair bir sıra məsələlər müzakirə olundu.
Bölmənin digər xəbərləri
