AZƏRBAYCAN PREZİDENTİ İLHAM ƏLİYEVİNÇIXIŞI
Əziz dostlar, bacılar və qardaşlar!
Sizin hamınızı ürəkdən salamlayıram.
Buraya sizinlə görüşə gəlmişəm. Biz sizinlə seçkilərdən əvvəl görüşmüşdük. O günü çox yaxşı xatırlayıram. Seçkilərdən ötən dövrdə Azərbaycan inkişaf edir, iqtisadi potensialını gücləndirir. Sosial problemlərin həlli istiqamətində böyük addımlar atılıbdır. Amma yenə də problemlər çoxdur və bu gün mənə verilən bu məktublara baxacağam. Sizə deyə bilərəm ki, mənə verilən bütün məktublara baxılır və tədbirlər görülür. Siz buna əmin ola bilərsiniz.
Bölgələrdə yeni iş yerlərinin açılması əsas prioritet məsələdir. Mən bu məqsədlə seçkilərdən sonra müvafiq Fərmanlar, göstərişlər vermişəm və indi də bu Fərmanların, qərarların icrası ilə maraqlanaraq, bölgələrə səfər edirəm. Artıq bir neçə rayonda olmuşam və bu səfərlər davam edəcəkdir. Mən özüm mövcud vəziyyətlə tanış olmalıyam, özüm görməliyəm ki, bu proqramlar öz həllini necə tapır. Qərarlar verilib, bütün müvafiq göstərişlər verilibdir. Büdcədə kredit üçün nəzərdə tutulmuş vəsait artırılır. Gələn ilin büdcəsində bu məbləğlər artırılacaqdır. Yerlərdə sahibkarlığın inkişafı üçün şərait yaradılmalıdır. Bunu yerli icra orqanları etməlidir. Əlbəttə, sahibkarlar da çalışmalıdırlar ki, Azərbaycanda müxtəlif sahələrdə yeni istehsal, yeni iş yerləri açılsın. Biz bu istiqamətdə bundan sonra da addımlar atacağıq.
Azərbaycan Heydər Əliyevin yolu ilə gedir və inkişaf edir. Mən seçkilərdən əvvəl sizinlə burada görüşümdə bəyan etdim ki, mən bu yola, siyasətə sadiqəm və bu siyasət Azərbaycanda bundan sonra da aparılacaq və bu işlərə heç kəs mane ola bilməz. Azərbaycan xalqı öz seçimini edibdir. Heydər Əliyev siyasətini dəstəkləyir. Biz hamımız bu siyasəti davam etdirməliyik və edəcəyik.
Mən sizin hamınıza uğurlar arzulayıram. Arzu edirəm ki, sizin həyatınız bundan da yaxşı olsun. Azərbaycan Respublikasının Prezidenti kimi mən əlimdən gələni edəcəyəm ki, biz buna nail olaq. Sağ olun.
Kimin nə sözü, nə dərdi var, desin.
YERDƏN SƏSLƏR: Cənab Prezident, çox sağ olun. Sizə uğurlar arzulayırıq. Prezident İlham Əliyevə eşq olsun!
Bölmənin digər xəbərləri
