Azərbaycan-Qazaxıstan münasibətləri yeni mərhələyə qədəm qoyur
Bakı, 11 aprel, AZƏRTAC
Son dövrlərdə Azərbaycan və Qazaxıstanın dövlət başçılarının qarşılıqlı səfərləri iki ölkə arasında münasibətlərdə yeni mərhələnin yaranmasına təkan verib. Budəfəki görüşdə də tam formatlı danışıqlar siyasi, ticari-iqtisadi, mədəni-humanitar sahələr də daxil olmaqla, kompleks şəkildə həyata keçirilib.
AZƏRTAC xəbər verir ki, bu barədə İqtisadi İslahatların Təhlili və Kommunikasiya Mərkəzinin Türk Dünyası Araşdırmaları Mərkəzinin rəhbəri vəzifəsini müvəqqəti icra edən Ayhan Satıcı Prezident İlham Əliyevin Qazaxıstana səfərini şərh edərkən bildirib.
İki ölkənin regionda bütün sahələr üzrə lokomotiv rolunda olması və qarşılıqlı müsbət əlaqələrin inkişafına meyillənməsi Avrasiya regionu üçün çox mühüm hesab edilə bilər: “Azərbaycan və Qazaxıstan arasında ticarət əlaqələri müsbət tendensiya ilə inkişaf edir. İxrac-idxal mallarının nomenklaturalarının genişləndirilməsi, ticarət dövriyyəsinin artırılması, qarşılıqlı investisiya qoyuluşlarının təşviq edilməsi, nəqliyyat-logistika sahəsində əməkdaşlığın dərinləşdirilməsi kimi məsələlər qarşıya qoyulan hədəflər sırasındadır”.
O diqqətə çatdırıb ki, Azərbaycanın 2022-ci il üzrə xarici ticarət göstəricilərinə nəzər yetirdikdə, Qazaxıstanla 104 milyon ABŞ dolları həcmində ixraca və 494,4 milyon ABŞ dolları həcmində idxala sahib olduğunu müşahidə etmək mümkündür. Bu da onu göstərir ki, Qazaxıstan Azərbaycanın Mərkəzi Asiya ölkələri ilə müqayisədə xarici ticarətində ixrac üzrə təqribən 56 faiz, idxal üzrə isə 43 faiz paya sahibdir. Dövlət başçılarının səsləndirdiyi fikirlər onu deməyə imkan verir ki, yaxın gələcəkdə bu göstəricilər artacaq və əmtəə dövriyyəsi bir milyard dollara çatdırılacaq.
Ayhan Satıcı qeyd edib ki, iki ölkə arasında aqrar-sənaye kompleksi məhsullarının ikitərəfli ticarətinin həcmi 3 dəfə artıb və 146 milyon ABŞ dollarına bərabər olub. 2021-ci illə müqayisədə 2022-ci ildə Azərbaycan və Qazaxıstan hər biri kənd təsərrüfatı məhsulu üzrə iqtisadi artım göstərib. Belə ki, 3,4 faizlik artımla Azərbaycanın kənd təsərrüfatı məhsulu 6,5 milyard ABŞ dollarına, 9,1 faizlik artımla Qazaxıstanın kənd təsərrüfatı məhsulu təqribən 20 milyard ABŞ dolları səviyyəsinə qalxıb. Həmçinin Qazaxıstanda Azərbaycan kapitalı ilə fəaliyyət göstərən mindən çox şirkət mövcuddur, o cümlədən Azərbaycanda Qazaxıstan kapitallı 150-dən çox şirkət fəaliyyət göstərir və bu sayın yaxın müddətdə artırılması üzrə işlər görülür. Buna misal olaraq, Qazaxıstan və Azərbaycan biznes sahiblərinin ticari-iqtisadi əlaqələrin inkişaf etdirilməsi missiyası çərçivəsində aprelin 5-də Bakıda imzaladıqları 55 milyon ABŞ dolları həcmində ixrac müqavilələrini göstərmək mümkündür.
O deyib: “Qazaxıstan və Azərbaycanın yerləşdiyi coğrafi mövqenin strateji əhəmiyyətini Orta Dəhlizin mövcudluğu ilə əlaqələndirmək olar. İki ölkə arasındakı çoxtərəfli əməkdaşlıqlar çərçivəsində tranzit imkanlarının genişləndirilməsi, multimodal nəqliyyat dəhlizlərinin mövcudluğu ilə biznesin inkişafı və investisiya qoyuluşlarının artması Mərkəzi Asiya, Cənubi Qafqaz, ümumilikdə Türk dünyasında qarşılıqlı əlaqələrin inkişafına töhfə verəcək. Fikrimcə, Qazaxıstan regionda nümunəvi təcrübənin icrasını reallaşdıran ölkə olaraq innovativ sahələrdə də inkişaf edir. Astana Beynəlxalq Maliyyə Mərkəzinin fəaliyyəti, “Astana International Exchange” birjasının portfel investisiyaların cəlb edilməsindəki rolu, “Tex Hub”ın təşviqi ilə elektron ticarət, startap ekosisteminin inkişafı və s. sahələr üzrə regionda qabaqcıl addımların atılması, qonşu ölkələrə, o cümlədən Türk dünyasına da müsbət təsir göstərəcək”.
Bölmənin digər xəbərləri
