AZƏRBAYCAN RESPUBLİKASI DAXİLİ İŞLƏR NAZİRLİYİNİN BƏYANATI
“Sərbəst toplaşmaq azadlığı haqqında” Azərbaycan Respublikasının Qanunu ilə müəyyən edilmiş qaydada təşkil olunmuş bütün toplantılarda daxili işlər orqanları tərəfindən asayişin və ictimai qaydanın qorunması təmin edilmiş, belə tədbirlərdə heç bir qanunazidd hallara yol verilməmişdir.
Lakin “Azadlıq” seçki blokuna daxil olan Azərbaycan Xalq Cəbhəsi, Müsavat və Azərbaycan Demokrat partiyalarının rəhbərləri, son aylar müvafiq icra hakimiyyəti orqanı tərəfindən məhdudiyyət qoyulmuş yerlərdə təşkil etdikləri kütləvi aksiyalarla ölkədəki ictimai-siyasi vəziyyəti gərginləşdirməyə, iğtişaşlar törətməyə, dövlət orqanları ilə qarşıdurma yaratmağa cəhdlər edir, hakimiyyətin zorla ələ keçiriləcəyi barədə açıq şəkildə bəyanatlar verir, cəmiyyətin ciddi etirazı ilə qarşılanan digər qanunsuzluqlara əl atırlar. Onların mövcud sabitliyi pozmağa, Azərbaycanın demokratik imicinə zərbələr vurmağa yönəlmiş cəhdləri bir çox hallarda konkret hüquqazidd və cinayət əməlləri ilə müşayiət olunur.
Son aylar “Azadlıq” seçki blokuna daxil olan partiyaların ölkənin paytaxtı Bakı şəhərində ictimai asayişi pozmaq məqsədi ilə keçirdikləri qanunsuz kütləvi aksiyaların qarşısının qətiyyətlə alınmasına, vətəndaşların tam əksəriyyətinin dövlətin gördüyü qanunauyğun tədbirlərə həmrəylik bildirməsinə baxmayaraq, həmin siyasi aksiyanın təşkilatçıları vəziyyəti gərginləşdirmək istəyindən hələ də əl çəkməmişlər.
Cəmiyyətdə və xalq arasında siyasi dayaqları olmayan radikal müxalifətin milli mənafelərə, konstitusion normalara və qanunlara zidd olan belə hərəkətləri ölkə ictimaiyyəti tərəfindən qətiyyətlə pislənir. Vətəndaşlar dövlət orqanlarına etdikləri müraciətlərdə Azərbaycanı yenidən 90-cı illərin əvvələrindəki xaosa, anarxiyaya, hakimiyyətsizliyə sürükləmək istəyənlər haqqında qanunvericiliklə müəyyən olunmuş məsuliyyət tədbirlərinin görülməsini tələb edirlər.
Qısamüddətli hakimiyyətləri dövründə Azərbaycan xalqının başına gətirilən ağır müsibətlərin əsil səbəbkarları olan radikal müxalifət partiyaları bu gün ölkəmizi idarəolunmaz proseslərə cəlb etmək məqsədi ilə yeni, daha məkrli bir siyasi avantüraya əl ataraq Rəsul Quliyevin 2005-ci il oktyabrın 17-də Azərbaycana gəlməsini planlaşdırmışlar. Qeyd olunmalıdır ki, Rəsul Quliyev “Azərneftyağ” Bakı neftayırma zavodunun direktoru işləyərkən istintaqla sübuta yetirilmiş 117 milyon ABŞ dollarından çox maliyyə vəsaitini taladığına, habelə qulluq mənafeyi əleyhinə olan cinayətlərdə ittiham olunduğuna görə haqqında məhkəmə tərəfindən həbs qətimkan tədbiri seçilərək beynəlxalq axtarışa elan edilmişdir. Rəsul Quliyev, həmçinin transmilli xarakter daşıyan cinayət əməli törətməkdə, o cümlədən həmin zavodun direktoru işləyərkən baş mühasib Qalina Lebedeva və Moskva şəhərində yaşayan Tamirlan Qasanovla qabaqcadan əlbir olub, tamah məqsədi ilə bilə-bilə saxta sənədlər tərtib etməklə dövlətin 10.000.000 ABŞ dolları məbləğində pul vəsaitini mənimsəmə və israfetmə yolu ilə talamaqda da ittiham olunur.
Həmişə uzun-uzadı demokratiyadan danışan, guya korrupsiyaya qarşı mübarizəni özlərinin ali məqsədi elan etmiş “Azadlıq” seçki blokunun təmsilçiləri bu gün heç bir qanuna və məntiqə sığmayan hərəkətlərə yol verir, Bakı şəhərində kütləvi itaətsizliyə, asayişin pozulamasına yönələn çağırışlar edirlər. Onlar əhalinin beynəlxalq hava limanına toplanması üçün təbliğat aparmaqla, 2005-ci il oktyabrın 17-də həmin ərazidə kütləvi aksiya keçirilməsini təşkil etməyə çalışırlar.
Azərbaycan Respublikasının Daxili İşlər Nazirliyi bəyan edir ki, məhkəmə tərəfindən barəsində 2000-ci il oktyabrın 10-da həbs qətimkan tədbiri seçilmiş Rəsul Quliyev Azərbaycana dönəcəyi halda məhkəmənin həmin qərarı icra ediləcəkdir. Rəsul Quliyevin deputatlığa namizədlər üçün müəyyən edilmiş toxunulmazlıq hüququ ilə bağlı bildiririk ki, bu təminat vətəndaşın əvvəllər törətdiyi cinayətlərə şamil edilmir.
Rəsul Quliyevin həbs edilməsi barədə məhkəmə qərarının icrası və sonrakı istintaq hərəkətlərinin aparılması zamanı onun cinayət-prosessual qanunvericilikdə və beynəlxalq hüquq normalarında nəzərdə tutulmuş hüquqlarının tam həcmdə həyata keçirilməsi təmin ediləcəkdir.
Digər tərəfdən, Daxili İşlər Nazirliyi strateji əhəmiyyətə malik olan Heydər Əliyev adına Beynəlxalq hava limanının mühafizəsinin təmin edilməsi üçün xüsusi tədbirlər də müəyyənləşdirmişdir. Daim əhalinin, o cümlədən beynəlxalq hava reysləri ilə hər gün ölkəmizə gələn xarici dövlətlərin minlərlə vətəndaşının sıx toplaşdığı ərazi olan bu mühüm dövlət obyektində hər hansı bir kütləvi aksiyanın keçirilməsinə edilən cəhdlərin qarşısı qətiyyətlə alınacaqdır. Baş verə biləcək hüquqazidd hərəkətlərə görə məsuliyyət bu işin təşkilatçılarının, ilk növbədə “Azadlıq” seçki blokuna daxil olan siyasi partiya rəhbərlərinin üzərinə düşəcəkdir.
Bölmənin digər xəbərləri
