Azərbaycan Texniki Universiteti və “Skaz Autohouse” şirkəti əməkdaşlığa başlayır
Bakı, 22 oktyabr, AZƏRTAC
Azərbaycan Texniki Universiteti və “Skaz Autohouse” MMC arasında əməkdaşlıq haqqında müqavilə imzalanıb.
Universitetdən AZƏRTAC-a bildirilib ki, sənədi rektor Vilayət Vəliyev və şirkətin direktoru Toğrul Paşayev imzalayıb.
Müqaviləyə əsasən tərəflər mövcud qanunvericiliyin tələblərinə uyğun olaraq nəqliyyat sektorunda elmi-texniki, innovativ, texnoloji yeniliklərin tətbiqi, gənc startapçıların layihələrinin reallaşdırılaraq icrasına dəstək göstərilməsi, əmək bazarının tələblərinə uyğun kadrlar hazırlanması istiqamətində əməkdaşlıq edəcək. Əməkdaşlıq çərçivəsində Maşınqayırma və robototexnika fakültəsinin bakalavr və magistr tələbələrinin şirkətdə təcrübə keçmələri və işlə təmin olunmaları da həyata keçiriləcək.
Bölmənin digər xəbərləri
