Azərbaycan uşaqların müdafiəsi və qayğı ilə əhatə olunması sahəsində fəal dövlət siyasətinə malikdir
Bakı, 1 iyun, AZƏRTAC
BMT Baş Assambleyasının qərarı ilə 1950-ci ildən hər il 1 Iyun - Uşaqların Beynəlxalq Müdafiəsi Günü kimi qeyd edilir.
Azərbaycan sosial dövlət olaraq uşaqların müdafiəsi, onların qayğı ilə əhatə olunması istiqamətində fəal dövlət siyasəti ilə seçilən ölkələrdən biridir. Prezident İlham Əliyevin sosial sahəyə xüsusi qayğısı nəticəsində vətəndaş rifahının təminatı istiqamətində aparılan ardıcıl islahatlar uşaq qayğı sisteminin inkişafı, uşaqların sosial təminatı və reabilitasiyası sahəsində də mühüm addımların atılmasına imkan verib.
Hazırda əlilliyi olan uşaqlar, ailə başçısını itirən və aztəminatlı (ünvanlı sosial yardım alan) ailələrdəki uşaqlar, şəhid ailələrinin, müharibə ilə əlaqədar əlilliyi olanların, beşdən çox uşağı olan qadınların, müddətli hərbi xidmət qulluqçularının uşaqları Əmək və Əhalinin Sosial Müdafiəsi Nazirliyi tərəfindən aylıq sosial ödənişlərlə təmin olunurlar.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, əlilliyi olan uşaqlara və işləyən valideynlərdən üç yaşadək uşaqlara qulluq edənlərə, valideyn himayəsindən məhrum uşaqların qəyyumlarına, övladlığa və himayəyə uşaq götürənlərə də aylıq sosial ödənişlər edilir. Yeni doğulan uşaqlara görə ailələrə, habelə himayəyə götürdükləri uşaqlara mövsümi geyim alınması üçün himayədar ailələrə birdəfəlik müavinət verilir. Ümumilikdə uşaqlarla bağlı 10-dan çox sosial ödəniş növü var və bu ödənişlər ümumilikdə 650 mindən çox şəxsi əhatə edir. 2018-ci ildən ötən dövrdə ölkədə müavinət və təqaüd ödənişlərində, həmçinin uşaqlarla bağlı sosial ödənişlərdə 5 dəfə artım baş verib.
Həssas qruplardan olan uşaqların inklüziv şəraitdə yaradıcı inkişafına dəstək verilməsi aparılan işlərin əsas istiqamətlərindən biridir. Birinci vitse-prezident Mehriban Əliyevanın təşəbbüsü ilə yaradılan DOST İnklüziv İnkişaf və Yaradıcılıq Mərkəzində əlilliyi olan və digər həssas qruplara aid uşaqların da reabilitasiyası, istedad və qabiliyyətlərinin inkişaf etdirilməsi üçün mühüm işlər aparılır. Mərkəzdə və onun İsmayıllı, Bərdə rayonlarındakı filiallarında ötən dövrdə 720 nəfərdən çox benefisiar təlimlərə və sosial-psixoloji dəstək tədbirlərinə cəlb edilib ki, onlardan 362 nəfərini uşaqlar təşkil edib.
Heydər Əliyev Fondunun “Uşaq evləri və internat məktəblərinin inkişafı” proqramı çərçivəsində isə əlilliyi olan uşaqlar üçün sosial xidmət müəssisələrində müasir tələblərə uyğun şərait yaradılıb. Bu müəssisələrdə uşaqlar reabilitasiya yönümlü sosial xidmətlərlə təmin edilirlər.
Eyni zamanda, nazirliyin Bakıda, Qəbələ və Şəmkir rayonlarında yerləşən 4 Uşaq Reabilitasiya Mərkəzində əlilliyi olan uşaqların tibbi-sosial reabilitasiyası işləri aparılır. Bu ilin ötən dövründə də həmin müəssisələrdə ambulator, stasionar, icma əsaslı, onlayn və səyyar formalarda 16 minə yaxın uşaq reabilitasiya xidmətləri ilə təmin olunub. Həmin dövrdə Nazirlik tərəfindən əlilliyi olan və digər həssas qruplardan olan daha 2,2 mindən çox uşağa isə səyyar, stasionar və yarımstasionar formalarda reabilitasiya yönümlü sosial xidmətlər göstərilib və hazırda da onlara bu xidmətlər davam etdirilir.
Övladlığagötürmə üzrə idarəetmə və xidmətlər 2019-cu il noyabrın 1-dən Əmək və Əhalinin Sosial Müdafiəsi Nazirliyinə həvalə olunub. Həmin vaxtdan nazirlik tərəfindən 730-dək uşaq övladlığa, himayədar ailə institutunun ölkəmizdə tətbiq edildiyi son iki ilə yaxın dövrdə isə 47 uşaq himayədar ailələrə verilib.
Bölmənin digər xəbərləri
