Azərbaycan və İtaliya arasında insan hüquqlarının müdafiəsi sahəsində əməkdaşlıq əlaqələri genişlənir
Bakı, 1 noyabr (AZƏRTAC). Azərbaycan Respublikasının insan hüquqları üzrə müvəkkili Elmira Süleymanova ölkəmizdə səfərdə olan İnsan Hüquqları üzrə İtaliya Helsinki Komitəsinin baş katibi Antonio Stanqo ilə görüşmüşdür.
Ombudsman Aparatının mətbuat xidmətindən AZƏRTAC-a bildirmişlər ki, görüşdə A.Stanqo Azərbaycana ilk dəfə səfər etdiyini söyləmiş, təmsil etdiyi təşkilatın İtaliyada insan hüquqlarının müdafiəsi üzrə aparıcı qurumlardan biri olduğunu diqqətə çatdırmış, adı çəkilən komitənin fəaliyyəti barədə məlumat vermişdir.
İnsan hüquqları üzrə müvəkkil E.Süleymanova respublikamızın bir sıra beynəlxalq konvensiyalara qoşulması, insan hüquqları sahəsində müvafiq qanunvericiliyin beynəlxalq hüquqi aktlara uyğunlaşdırılması, təsisatın 11 ildən artıq müddətdə səmərəli fəaliyyət göstərməsi barədə danışmış, dövlət qurumları və QHT-lərlə yanaşı, nüfuzlu beynəlxalq təşkilatlarla da sıx əməkdaşlıq şəraitində çalışdığını diqqətə çatdırmışdır. Ombudsman təsisatın Avropa İttifaqının “Şərq Tərəfdaşlığı”, Tvinninq və TAİEX layihələri çərçivəsində keçirilən tədbirlərdə fəal iştirak etdiyini söyləmişdir.
“Azərbaycan Respublikasında İnsan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”nın (MFP) təsdiq edildiyi, bu Proqramın həyata keçirilməsinin əlaqələndirilməsi üzrə İşçi Qrupunun fəaliyyətinə rəhbərliyin Ombudsmana tövsiyə olunduğu bildirilmişdir.
Ombudsman ölkə həyatının bütün sahələrində inkişaf siyasətinin əsas strateji hədəflərini ehtiva edən “Azərbaycan 2020: gələcəyə baxış” İnkişaf Konsepsiyasını da xüsusi qeyd etmişdir.
Qonaq Ombudsmanın insan hüquqları sahəsində çoxşaxəli fəaliyyətini yüksək dəyərləndirmiş və onunla əməkdaşlıqda maraqlı olduğunu söyləmişdir.
Sonda insan hüquqları üzrə müvəkkil qonağın suallarını cavablandırmışdır.
Bölmənin digər xəbərləri
