Azərbaycan “WorldSkills International” təşkilatının müsabiqə komitəsinin iclasında təmsil olunub
Bakı, 12 oktyabr, AZƏRTAC
Azərbaycan nümayəndə heyəti “WorldSkills International” təşkilatının müsabiqə komitəsinin iclasına qatılıb.
Peşə Təhsili üzrə Dövlət Agentliyindən AZƏRTAC-a bildirilib ki, 2 gün davam edən onlayn iclasda 2022-ci ilin oktyabr ayında Çinin Şanxay şəhərində keçiriləcək növbəti yarışlara hazırlıq, tətbiq ediləcək qaydalar, iştirakçıların yaş məhdudiyyəti və digər məsələlərlə bağlı yeniliklər açıqlanıb. Sözügedən yarışlarda Azərbaycan kibertəhlükəsizlik, aşpazlıq və veb-texnologiyalar olmaqla 3 bacarıq istiqaməti üzrə təmsil olunacaq. Yarışlar iştirakçı gənclərə öz bilik və bacarıqlarını nümayiş etdirməyə şərait yaradacaq. Eyni zamanda, müsabiqədə ölkəmizi təmsil edəcək sahə mütəxəssisləri müvafiq ixtisaslarda beynəlxalq standartları öyrənmək və tədrisdə tətbiq etmək imkanı əldə edəcəklər.
Xatırladaq ki, “WorldSkills Azerbaijan” peşəkarlığın və bacarıqların inkişafı üçün milli platformadır. Azərbaycan ötən ilin oktyabr ayında peşə bacarıqlarını beynəlxalq səviyyədə təbliğ edən “WorldSkills” hərəkatına qoşulub. Dünyada müxtəlif bacarıq istiqamətləri üzrə olimpiya yarışlarının təşkilatçısı kimi tanınan “WorldSkills” əmək bazarının tələblərinə və qlobal standartlara uyğun peşəkarlar yetişdirmək, həmin standartları təhsil sisteminə inteqrasiya etmək imkanı yaradır.
Bölmənin digər xəbərləri
