AZƏRBAYCANDA DÖVLƏT QULLUĞUNUN ƏSAS MEYARI DÖVLƏTƏ SƏDAQƏT VƏ XALQA XİDMƏTDİR
Bakı, 22 iyun (AZƏRTAC). 23 iyun - Azərbaycanda dövlət qulluqçularının peşə bayramı günüdür. Dövlət qulluqçuları peşə bayramlarını Prezident İlham Əliyevin 2006-cı il 25 may tarixli Sərəncamına əsasən qeyd edirlər.
İyunun 23-nün Azərbaycanda dövlət qulluqçularının peşə bayramı elan olunması haqqında qərar BMT Baş Məclisinin tövsiyələri nəzərə alınaraq qəbul edilmişdir.
Müstəqillik yolunda uğurla irəliləyən Azərbaycanın beynəlxalq aləmdə öz nüfuzunu möhkəmləndirməsi ümummilli liderimiz Heydər Əliyevin dövlət idarəetmə sistemində həyata keçirdiyi islahatlardan başlamışdır.
Prezident İlham Əliyevin bu islahatları qətiyyətlə davam etdirməsi sayəsində ölkəmizin qüdrəti gündən-günə yüksəlməkdədir. Bu gün inamla demək olar ki, respublikamızda müasir tələblərə cavab verən dövlət idarəetmə sistemi qurulmuş, hakimiyyətin bütün qollarının funksiyaları dəqiq müəyyənləşdirilmiş, vətəndaşların hüquq və azadlıqlarının qorunması və həyata keçirilməsi üçün zəruri təsisatlar yaradılmışdır.
Azərbaycanda dövlət qulluqçusunun funksiyaları, hüquq və vəzifələri bu sahədə əsas normativ hüquqi akt olan “Dövlət qulluğu haqqında” Azərbaycan Respublikasının Qanunudur. Həmin qanun qəbul edildikdən sonra isə Konstitusiyada müəyyən edilən insan hüquq və azadlıqlarının təmin olunmasına xidmət göstərən digər normativ hüquqi aktlar qəbul olunmuş və bu sahədə dünya təcrübəsini nəzərə alan geniş hüquqi baza yaradılmışdır. Bu sənədlər Azərbaycanda dövlət qulluğunun əsas istiqamətlərini əhatə edərək dövlət qulluqçularının fəaliyyəti üçün lazımi hüquqi zəmin, müvafiq icra və nəzarət mexanizmini formalaşdırmışdır.
Bütün bunlar cəmiyyətdə sosial ədaləti və vətəndaşların layiqli həyat tərzini təmin etmək, demokratik təsisatları inkişaf etdirmək, elmin, mədəniyyətin və təhsilin səviyyəsini yüksəltmək üçün dövlət qulluqçuları qarşısında geniş imkanlar açmışdır.
Ümumiyyətlə, dövlət qulluğu təkcə geniş səlahiyyətlər deyil, eyni zamanda, cəmiyyətdə gedən proseslərin idarə olunması və cəmiyyətin inkişafı üçün məsuliyyət deməkdir. Bu işdə çalışanlardan sahəni dərindən bilməklə yanaşı, dövlətinə və xalqına son dərəcə sədaqətli olmaq, dövlətlə xalq arasında əlaqələndirici vasitə kimi xalqın problemlərini və qayğılarını öyrənmək, onların həlli yollarını axtarıb tapmaq tələb olunur. Dövlət qulluqçusunun andında onun üzərinə götürdüyü öhdəliklər aydın və konkret ifadə olunmuşdur: “Azərbaycan Respublikasına sadiq olacağıma, onun Konstitusiyasına dönmədən əməl edəcəyimə, dövlət sirrini və xidməti sirri qoruyacağıma, dövlət qulluğunun mənə verdiyi hüquqları və üzərimə qoyduğu vəzifələri qərəzsiz, vicdanla, ancaq qanuna uyğun surətdə, var gücümlə və Vətənin mənafeyi naminə həyata keçirəcəyimə and içirəm”.
Dövlət qulluqçusunun fəaliyyətinin müvafiq qanunlar və digər normativ hüquqi aktlarla tənzimlənməsinə baxmayaraq, onun prinsipiallığından, işgüzarlığından və səriştəsindən də çox şey asılıdır.
Bu gün respublikamızda fəaliyyət göstərən müxtəlif nazirliklər, komitələr və digər dövlət qurumlarında 28 minə yaxın dövlət qulluqçusu çalışır ki, onların da üzərinə böyük və məsul vəzifələr düşür.
Müstəqillik illərində Azərbaycanda hüquqi dövlətin qurulması, idarəetmə sisteminin təkmilləşdirilməsi, ölkənin daha yaxşı idarə olunması üçün zəruri tədbirlər görülmüş, bir çox strukturlar ləğv edilmiş və yeni idarəetmə orqanlarının yaradılması davam etdirilmişdir. Bu orqanların dövlət quruculuğunda və ölkənin idarə olunmasında rolunu artırmaq və işini səmərəli təşkil etmək üçün vaxtaşırı olaraq onların əsasnamə və nizamnamələrində, eləcə də strukturlarında müvafiq dəyişikliklər edilir, vəzifələri və funksiyaları dəqiqləşdirilir.
Respublikamızda dövlət qulluqçularının peşəkarlığını artırmaq məsələləri daim diqqət mərkəzində saxlanılır. Bu məqsədlə Azərbaycan Respublikasının Prezidenti yanında Dövlət İdarəçilik Akademiyası artıq bir neçə ildir ki, dövlət qulluqçularının hazırlanmasında, mərkəzi və yerli icra hakimiyyəti orqanlarında çalışan dövlət qulluqçularının peşə səviyyəsinin yüksəldilməsində, bu məqsədlə açılan ixtisasartırma kurslarında təhsilin təşkil edilməsində, dövlət qulluğu məsələlərinə dair elmi-tədqiqat işlərinin aparılmasında, dövlət qulluğunun nəzəri və praktiki məsələlərinin öyrənilib müvafiq təkliflər verilməsində rolu böyükdür. Dövlət İdarəçilik Akademiyasında fəaliyyət göstərən qısamüddətli kurslarda hər il yüzlərlə dövlət qulluqçusu idarəetmənin müasir tələblərini, bu sahədə olan yenilikləri həvəslə öyrənir, çalışdıqları idarə və müəssisələrin işində tətbiq edirlər.
Dövlət qulluğunun əsas tələblərindən biri də kadrların seçilməsində şəffaflığın təmin edilməsi, dövlət qulluğuna qəbulun test və müsabiqə yolu ilə keçirilməsidir. Hər il respublikanın mərkəzi və yerli icra hakimiyyəti orqanlarında boş olan yerlərə kadrların qəbul edilməsi üzrə keçirilən müsabiqələr buna əyani sübutdur. Müvafiq dövlət orqanlarının keçirdikləri test imtahanları və müsabiqələr, ilk növbədə dövlət qulluqçularının işə qəbulunda mənfi halların qarşısını almağa, ən layiqli şəxsləri dövlət qulluğuna götürməyə, bütövlükdə, idarəetmə sistemini daha peşəkar kadrlarla təmin etməyə xidmət göstərir.
Artıq beşinci ildir ki, Azərbaycanın dövlət qulluqçuları özlərinin peşə bayramını qeyd edirlər. Bu müddət ərzində Azərbaycan Prezidentinin sərəncamları ilə bir çox dövlət qulluqçusu yüksək ixtisas dərəcəsi almış, məhz dövlət qulluqçuları üçün təsis olunmuş “Vətənə xidmətə görə” ordeninin müxtəlif dərəcələri, “Dövlət qulluğunda fərqlənməyə görə” medalı və “Əməkdar dövlət qulluqçusu” adı ilə təltif olunmuşdur. Bu peşə bayramı həm də dövlət qulluqçularının ölkə rəhbərliyi və xalq qarşısında hesabatı şəklini almışdır. Dövlət qulluqçuları bilirlər ki, çətin, məsuliyyətli olduğu qədər, həm də şərəfli olan vəzifələrini nə qədər vicdanla yerinə yetirsələr, bir o qədər cəmiyyətin tərəqqisinə kömək etmiş olarlar. Ona görə də dövlət qulluqçuları öz gündəlik işlərini yerinə yetirərkən, ilk növbədə dövlətin və xidmət etdiyi xalqın etimadını doğrultmaq barədə düşünürlər. Bu işdə onlara uğurlar arzulayırıq.
Vüqar Ağayev
AZƏRTAC-ın müxbiri
Bölmənin digər xəbərləri
