Azərbaycanın baş konsulu: Məqsədimiz torpaqlarımızı azad etməkdir
Moskva, 6 oktyabr, AZƏRTAC
Hazırda müharibə Azərbaycan ərazisində gedir. “Azərbaycanın xəritəsinə baxın, Dağlıq Qarabağın harada yerləşdiyini görün, özünüz də bunu asanlıqla başa düşəcəksiniz. Biz öz evimiz uğrunda mübarizə aparırıq. Bu səbəbdən “qan tökməkdə” günahlandırıldığımızı eşitmək mənə və həmvətənlərimə çox qəribə gəlir.
AZƏRTAC xəbər verir ki, Azərbaycanın Sankt-Peterburqdakı baş konsulu Sultan Qasımov bu fikirləri Rusiyada çıxan “Komsomolskaya Pravda” qəzetinə müsahibəsində söyləyib.
S.Qasımov xatırladıb ki, Ermənistan-Azərbaycan Dağlıq Qarabağ münaqişəsi hələ 1988-ci ildə, “Ermənistan rəhbərliyi həmişə Azərbaycanın tarixi ərazisi olmuş Dağlıq Qarabağ Muxtar vilayətini ələ keçirməyi qərara aldığı vaxt başlanıb. İndi belə çıxır ki, 30 ildən çoxdur bizim əzəli ərazilərimizin bir hissəsi qonşu ölkə tərəfindən faktiki olaraq işğal edilib. Özü də işğal faktını bütün dünya birliyi etiraf edir. Dünyanın bütün dövlətləri Azərbaycanın ərazi bütövlüyünü dəstəkləyir. Dünyada heç bir ölkə qondarma “DQR-i” tanımır. Gəlin unutmayaq ki, hələ 1990-cı illərin əvvəlində Birləşmiş Millətlər Təşkilatının Təhlükəsizlik Şurası erməni silahlı dəstələrinin Azərbaycan ərazisindən qeyd-şərtsiz çıxarılmasını tələb edən dörd qətnamə qəbul edib. Lakin vəziyyət dəyişmir”.
Baş konsul daha sonra qeyd edib ki, hazırda müharibə Azərbaycan ərazisində gedir. “Azərbaycanın xəritəsinə baxın, Dağlıq Qarabağın harada yerləşdiyini görün, özünüz də bunu asanlıqla başa düşəcəksiniz. Biz öz evimiz uğrunda mübarizə aparırıq. Bu səbəbdən “qan tökməkdə” günahlandırıldığımızı eşitmək mənə və həmvətənlərimə çox qəribə gəlir. Hörmətli Prezidentimiz İlham Əliyevin dediyi kimi, “Belə suallar verməzdən əvvəl soruşun ki, erməni əsgəri bizim torpaqda nə edir? Erməni ordusu bizim torpaqda nə edir?!” Nə etməli idik? Biz artıq 30 ildir gözləyirik ki, münaqişənin sülh yolu ilə həll edilməsi üçün yaradılan, Rusiya, ABŞ və Fransanın həmsədr ölkələr olduğu ATƏT-in Minsk Qrupu problemi həll edəcək. Amma hələ də bir nəticə yoxdur”, - deyə Sultan Qasımov vurğulayıb.
Baş konsul müharibənin nə zaman hansı şərtlərlə bitməsinə dair sualı isə belə cavablandırıb: “Ermənistan üçün yeganə tələbimiz var idi - ərazilərimizdən qoşunların çıxarılması. Axı, əslində, yalnız Dağlıq Qarabağın özü deyil, Azərbaycanın daha yeddi bölgəsi Ermənistanın işğalı altındadır. Biz Ermənistan silahlı qüvvələrinin Dağlıq Qarabağ ərazisindən və ətrafındakı yeddi bölgədən tamamilə və dərhal çıxarılması şərtilə danışıqlara hazırıq. Axı, biz sülhün bir şərtlə - erməni qoşunlarının ərazilərimizdən tamamilə çıxarılmasından və bir milyona yaxın məcburi köçkünün doğma torpaqlarına qayıtmasından sonra bərqərar olacağını dəfələrlə bəyan etmişik”.
S.Qasımov münaqişənin nizamlanmasında Rusiyanın rolu haqqında sualın cavabında deyib: “Artıq dediyim kimi, Rusiya ATƏT-in Minsk qrupunun həmsədr ölkələrinin böyük üçlüyünə daxildir və Azərbaycan məhz Rusiyaya başqalarından daha çox meyl edir. Ölkələrimiz, xalqlarımız bir-birini mental şəkildə, dərindən və çox qədimdən anlayırlar. Ən başlıcası, biz gözəl başa düşürük ki, Rusiya da bizim kimi sülh istəyir. Buna görə də biz gözləyirik və çox ümid edirik ki, məhz Rusiya ermənilərə onların mövqeyinin səhv olmasını izah edə bilər.
Baş konsul xatırladıb ki, Azərbaycan 30 il müddətində Ermənistanla danışıqlar aparır, lakin nəticə yoxdur. Diplomat deyib: “Hər şeyin, o cümlədən insanın səbrinin də həddi var. Fikir verin: 30 il biz münaqişənin dinc yolla nizamlanacağına ümid edərək danışıqlar apardıq. Təkrar edirəm, bizim məqsədimiz torpaqlarımızı azad etməkdir. Rusiyanın bəzi KİV-ləri münaqişəni “zərgər dəqiqliyi ilə” qeyri-obyektiv və məqsədyönlü şəkildə işıqlandırmasını, yumşaq desək Azərbaycan ilə Rusiya arasında çoxəsrlik dostluq münasibətlərinə zərər vurmaq üçün əllərindən gələni etdiklərini görmək mənə çox ağır gəlir.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
