İDMAN
Azərbaycanın Milli Olimpiya Komitəsinin nümayəndəsi Madriddə beynəlxalq marketinq seminarında iştirak edib
Bakı, 20 sentyabr, AZƏRTAC
İspaniyanın Madrid şəhərində təşkil edilmiş beynəlxalq marketinq seminarı başa çatıb. Seminar Beynəlxalq Olimpiya Komitəsinin Olimpiya Həmrəyliyi Fondunun dəstəyi və Marketinq Televiziya Xidmətləri İdarəsi, həmçinin İspaniya Olimpiya Komitəsinin təşkilatçılığı ilə keçirilib.
AZƏRTAC xəbər verir ki, üçgünlük seminarda Azərbaycanı Milli Olimpiya Komitəsinin marketinq idarəsinin rəisi Mehman Kərimov təmsil edib.
Tədbirdə 55 ölkədən 70 nəfərə yaxın nümayəndə və qonaq iştirak edirdi. Builki seminara ilk dəfə olaraq Beynəlxalq Paralimpiya Komitəsinin də nümayəndələri dəvət olunmuşdular.
Milli Olimpiya komitələri üçün beynəlxalq marketinq seminarı 2016-cı ildən təşkil edilir. Seminarın təşkilində əsas məqsəd “Olimpiya Gündəliyi 2020” sənədinin tövsiyələrinə uyğun olaraq, Milli Olimpiya komitələrinə təmsil olunduqları ölkələrdə marketinq fəaliyyətlərini genişləndirməkdə kömək etməkdir. Budəfəki seminarın Madriddə təşkil edilməsinin əsas səbəbi bu şəhərdə fəaliyyət göstərən Olimpiya Yayım Xidməti və Olimpiya Kanalı Xidməti ilə daha yaxından tanış olmaq idi.
Seminarda sürətlə yeniləşən və genişlənməkdə olan marketinq və televiziya xidmətləri, rəqəmsal informasiya texnologiyalarından (o cümlədən sosial media) istifadəyə dair yeni qaydalar və müvafiq təlimatlar, oktyabr ayında Argentinada keçiriləcək Yeniyetmələrin 3-cü Yay Olimpiya Oyunları zamanı tətbiq ediləcək marketinq və İKT yenilikləri, Yeniyetmələrin 3-cü Yay Olimpiya Oyunları zamanı Oyunların yayımında Olimpiya Yayım Xidməti və Olimpiya Kanalı Xidmətinin rolu, müvafiq sahədə üzv MOK ilə əməkdaşlıq, XXXII “Tokio 2020” Yay Olimpiya Oyunlarının təşviqi, Olimpiya Oyunlarının Ümumdünya Tərəfdaşları ilə əməkdaşlığın genişləndirilməsinə dair BOK-un tövsiyələri və dəstəyi kimi məsələlər müzakirəyə çıxarılıb.
Mehman Kərimov tədbir çərçivəsində Olimpiya Kanalı Xidmətinin rəhbəri Mark Parkman, BOK-un Kommersiya İnteqrasiyası üzrə vitse-prezidenti xanım Elisabeth Allaman, P&G şirkətinin Kommunikasiya üzrə rəsmisi xanım Kathryn Davies, bir sıra MOK rəsmiləri ilə görüşüb, “Bakı 2015” Avropa Oyunlarından sonra Azərbaycan Milli Olimpiya Komitəsinin marketinq sahəsində həyata keçirdiyi layihələr və əldə etdiyi uğurlar haqqında danışıb, birgə əməkdaşlığa dair planları müzakirə edib.
Seminarda Beynəlxalq Olimpiya Komitəsi ilə dünyanın aparıcı sığorta və maliyyə xidmətləri şirkəti olan “Allianz" arasında tərəfdaşlıq sazişi imzalanıb. Beləliklə “Allianz” BOK-un və Olimpiya Oyunlarının Ümumdünya Tərəfdaşlığı (World TOP) proqramına qoşulan sayca 5-ci, ümumilikdə, 14-cü tərəfdaşı olub. “Allianz” ilə əməkdaşlıq 2021-2028-ci illəri əhatə edir.