AZƏRBAYCANIN PARLAMENT NÜMAYƏNDƏ HEYƏTİNİN SƏUDİYYƏ ƏRƏBİSTANI KRALLIĞINA SƏFƏRİ BAŞA ÇATMIŞDIR
Səfər müddətində Milli Məclisin nümayəndə heyəti İki Müqəddəs Məscidin Xadimi, Səudiyyə Ərəbistanının Kralı Fəhd bin Əbdüləziz Al Səud, vəliəhd şahzadə Əlir Abdulla bin Əbdüləziz, Səudiyyə Ərəbistanı Krallığı Şura Məclisinin sədri doktor Saleh bin Abdulla Humeyd, Baş nazirin ikinci müavini, müdafiə və aviasiya naziri şahzadə əmir Sultan bin Əbdüləziz, Ər-Riyad bölgəsinin əmiri şahzadə əmir Salman bin Əbdüləziz və bu ölkənin digər yüksək vəzifəli rəsmiləri ilə görüşlər keçirmişdir.
Görüşlər zamanı parlamentlərarası əlaqələrin, qardaşlıq və dostluq münasibətlərinin inkişafı, islam ölkələrinin birliyi, Dağlıq Qarabağ problemi, hər iki ölkənin iqtisadiyyatının inkişaf perspektivləri, Azərbaycan Respublikası Hökuməti və Səudiyyə Ərəbistanı Krallığı Hökuməti arasında müxtəlif sahələrdə əməkdaşlıq, terrorizmə qarşı mübarizə və digər mühüm məsələlər müzakirə olunmuşdur.
Keçirilmiş görüşlərdə Milli Məclisin sədri Murtuz Ələsgərov ölkələrimiz arasında diplomatik münasibətlərin yaradılması tarixindən, ümummilli liderimiz Heydər Əliyevin bu sahədə xidmətlərindən danışmış, Azərbaycanda parlamentarizm ənənələri, Ermənistan-Azərbaycan, Dağlıq Qarabağ münaqişəsi barədə ətraflı məlumat vermişdir. Sədr Dağlıq Qarabağ problemində Azərbaycanın haqq işini birmənalı şəkildə müdafiə etdiklərinə görə Səudiyyə Ərəbistanı Krallığının rəhbərliyinə və xalqına təşəkkürünü bildirmişdir.
Tərəflər bundan sonra da ölkələrimiz arasında mövcud olan qarşılıqlı əməkdaşlığın daha da inkişaf etdirilməsi, parlament əlaqələrinin möhkəmləndirilməsi və qanun yaradıcılığı sahəsində təcrübə mübadiləsinin genişləndirilməsi istiqamətində yeni-yeni uğurların əldə ediləcəyinə əmin olduqlarını vurğulamışlar.
Səfər müddətində parlament nümayəndə heyətimiz müsəlman aləminin müqəddəs şəhərləri olan Məkkə və Mədinəni də ziyarət etmiş, Səudiyyə Ərəbistanının tarixi yerləri ilə tanış olmuşlar.
Milli Məclisin sədri Murtuz Ələsgərovun başçılığı ilə parlament nümayəndə heyəti fevralın 22-də Vətənə dönmüşdür. Binə hava limanında nümayəndə heyətini Milli Məclis sədrinin müavini Ziyafət Əsgərov və digər rəsmi şəxslər qarşılamışlar.
Bölmənin digər xəbərləri
