AZƏRBAYCANIN RUSİYADAKI SƏFİRLİYİ “RODİNA” PARTİYASININ İRƏLİ SÜRDÜYÜ QANUN LAYİHƏSİNİ ŞƏRH EDİR
D.Roqozin oktyabrın 17-də “İnterfaks” agentliyinin mərkəzi ofisində keçirilən mətbuat konfransında təsdiqləmişdir ki, onun partiyasının nümayəndələri belə bir qanun layihəsi hazırlamışlar. Qanun layihəsi Dövlət Dumasının profil komitəsindədir və “Rodina” partiyası ona tezliklə baxılmasında israrlıdır. Roqozinin sözlərinə görə, bu sənəd “Ümumavropa normalarına – Şengen normalarına və Avropa Birliyinin qanunvericiliyinə əsaslanır”. Deputat vurğulamışdır ki, pərakəndə ticarət aparmaq sahəsində bütün üstün hüquqlar dövlətin vətəndaşlarına məxsus olmalıdır. “Qanun layihəsinin mənası ondan ibarətdir ki, pərakəndə ticarətin iştirakçısı imkanına malik olmaq üçün əcnəbilər xüsusi əmək vizası almalıdırlar. Biz azərbaycanlıların, türkmənlərin və başqa millətlərin əleyhinə deyilik, lakin görürük ki, iqtisadiyyatın bütöv bir sahəsini əcnəbilər ələ keçirirlər, mütəşəkkil etnik qruplar öz vətəndaşlarımızı, sadəcə olaraq, sıxışdırıb aradan çıxarırlar”.
Xatırladaq ki, Dmitri Roqozin Moskvanın “Vedomosti” qəzetinin 11 oktyabr tarixli nömrəsində dərc olunmuş “Qafqazlılar “Rodina”nı təngə gətirmişlər” sərlövhəli müsahibədə bildirmişdir ki, onun məlumatına görə, Rusiyada 2 min etnik cinayətkar qrup fəaliyyət göstərir, lakin ticarət sahəsində sırf ixrisaslaşma getmişdir. 1990-cı illərin əvvəlindən bəri Azərbaycan qrupu meyvə-tərəvəz bazalarına tam nəzarət edir, 2005-ci ilin iyul ayından isə Moskvadakı bütün bazalara milliyyətcə azərbaycanlı olan şəxslər başçılıq edirlər”.
Azərbaycanın Rusiyadakı səfiriliyi D.Roqozinin bu çıxışları ilə əlaqədar bəyanat vermişdir. Bəyanatda bir sıra səbəblərlə əlaqədar narahatlıq ifadə olunur.
Sənəddə deyilir ki, “hüquqi baxımdan, söhbət əcnəbi vətəndaşların Rusiya qanunvericiliyində təsbit olunmuş mülkiyyət, əmək hüquqlarının, digər demokratik hüquq və azadlıqların aşkar şəkildə pozulmasından gedir, biz hələ qanun layihəsinin bazar iqtisadiyyatının prinsiplərinə açıq-aydın zidd olduğunu demirik”.
Büdcə mənafelərinin və yerli əmək ehtiyatlarının müdafiəsinə dair tezislərlə pərdələnən bu təşəbbüs bəyan edilən məqsədlərə iqtisadi baxımdan heyrətamiz dərəcədə ziddir. Əcnəbi vətəndaşların iqtisadi məşğulluğu sahəsində problemlər həqiqətən mövcuddur və onları həll etmək lazımdır. Söhbət, məsələn, qanunsuz töycülər alınması praktikası ilə, vergiqoymanın “boz” və “qara” sxemləri ilə mübarizədən, lisenziyalaşdırmadan, qeydiyyatdan, mülkiyyət hüquqlarının qorunmasından gedir. Hamıya aydındır ki, problemin mahiyyəti əcnəbilərin vergiləri pis ödəməsində deyildir. Əksinə, onlar “vergiləri” çox yaxşı ödəyirlər. Onların təqsiri deyil ki, həmin “vergilər” büdcəyə daxil olmur. Bu məsələlərdə qayda-qanun yaradılması əmək miqrantlarının da, Rusiya büdcəsinin də, nəticə etibarilə, Rusiya vətəndaşlarının da xeyrinə olardı.
Bəyanatda vurğulanır ki, bu məsələlərin həllinə çalışmaqdansa, əcnəbilərin, - yeri gəlmişkən, onların çoxu Rusiya vətəndaşları üçün də real iş yerləri açır, - qanunvericilik yolu ilə təsbit olunmuş hüquqlarını təmin etməkdənsə, əcnəbilərin sahibkarlıq və sərmayəqoyma fəallığı üçün əlverşli şərait yaratmaqdansa (bunun bütün Rusiya cəmiyyəti üçün müsbət iqtisadi səmərəsi olardı), - “Rodina” partiyasının nümayəndələri populist və seçkiqabağı məqsədlər naminə onların hüquqlarının daha çox məhdudlaşdırılmasına açıq surətdə can atırlar.
Sənəddə siyasi baxımdan, qanun layihəsinin cəmiyyətdə bəzi etnik qruplar barəsində, təəssüf ki, onsuz da güclü olan qərəzli əhval-ruhiyyəni aşkar surətdə stimullaşdırılması həyəcan doğuran hal adlandırılır. Təşəbbüslərin müəllifləri onların bütün nəticələrini dərk etməyərək, yaxud, ola bilsin, dərk edərək, - bu isə daha betərdir, - ekstremist və ksenofobist (əcənbilərə nifrət bəsləmək) qüvvələrin hamısına aydın və dəqiq işarə verirlər ki, sizin partiyanız məhz bizik və sizin mənafelərinizi məhz biz hamıdan yaxşı qoruyuruq.
Bəyanatın sonunda deyilir: “Bu şərh edilənlərlə əlaqədar Azərbaycanın Rusiyadakı səfirliyi ümidvar olduğunu bildirir ki, ksenofobiyaya əsaslanan bu qanun layihəsinə baxılarkən RF Dövlət Duması özünə xas məsuliyyətlə yanaşma nümayiş etdirəcək və Rusiya qanunvericiliyinin normalarını və çoxmillətli Rusiya Federasiyasının mənafelərini rəhbər tutacaqdır”.
Bölmənin digər xəbərləri
