Azərbaycanın Ukraynadakı səfirliyində Kiyev Şəhər Şurasının deputatı seçilmiş həmvətənimiz ilə görüş keçirilmişdir
Kiyev, 13 iyun (AZƏRTAC). Azərbaycanın Ukraynadakı səfirliyində həmvətənimiz, Ukraynanın tanınmış jurnalisti, populyar tok-şoulardan birinin - “Kiyev forumu”nun müəllifi və aparıcısı Rəna Nəzərova ilə görüş keçirilmişdir. Xatırladaq ki, R.Nəzərova mayın 25-də keçirilən seçkilərdə Vitali Kliçkonun “UDAR” Partiyasından Kiyev Şəhər Şurasının deputatı seçilmişdir.
Səfir Eynulla Mədətli R.Nəzərovanı Kiyev Şəhər Şurasına seçilməsi münasibətilə səmimi-qəlbdən təbrik edərək, bu faktı təkcə paytaxt Kiyevdə deyil, həm də bütövlükdə Ukraynada Azərbaycan diasporunun həyatında tarixi hadisə adlandırmışdır. R.Nəzərova hazırda Ukraynanın yerli idarəetmə orqanlarında təmsil olunmuş birinci və yeganə azərbaycanlıdır.
Təbriklərə görə diplomatik nümayəndəliyimizin başçısına minnətdarlığını bildirən R.Nəzərova jurnalist və siyasətçi kimi planlarından söz açmışdır. O, səfiri əmin etmişdir ki, dost ölkədə çoxsaylı diasporumuzu fəal şəkildə və layiqincə təmsil edəcək, tarixi Vətənimiz Azərbaycanla əlaqələri möhkəmləndirəcəkdir.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
