AZƏRBAYCANIN YUNAN-ROMA GÜLƏŞİ ÜZRƏ YIĞMA KOMANDASI QARŞIDAKI YARIŞLARA HAZIRLAŞIR
Azərbaycan Güləş Federasiyasının mətbuat xidmətinin rəhbəri Mətləb Abdullayev AZƏRTAC-a bildirmişdir ki, yunan-Roma güləşi üzrə yığma komandamızın tərkibində yer alan idmançılar arasında heç bir fikir ayrılığı yoxdur. Hazırda idmançılar yığmanın tərkibində Bakıda qarşıdakı yarışlara hazırlaşırlar.
Yunan-Roma güləşi üzrə yığmanın ciddi təlim-məşqlər keçdiyini söyləyən federasiya təmsilçisi vurğulamışdır ki, dekabrda Bakıda yunan-Roma, sərbəst və qadın güləşi üzrə ölkə birinciliyinə start veriləcəkdir.
Bu yarışda iştirak edəcək idmançılarımızın sırasında Rövşən Bayramov (55 kq), Vitali Rəhimov (60 kq), İlqar Badulov (74 kq) və digər idmançılar yer almışlar. Olimpiya və dünya çempionu Fərid Mansurov (66 kq) isə zədəli olduğundan təlimlərdə iştirak edə bilmir.
Bildirilmişdir ki, 2009-cu ilin yanvarında Rusiyada və oktyabrda Türkiyədə keçiriləcək yunan-Roma, sərbəst və qadın güləşi üzrə beynəlxalq turnirlərdə də bu adı çəkilən idmançıların iştirakı nəzərdə tutulur.
Bölmənin digər xəbərləri
