Azərbaycanın Zəfər Günü Afinada qeyd olunub
Afina, 6 noyabr, AZƏRTAC
Vətən müharibəsinin birinci ildönümü münasibətilə Azərbaycanın Yunanıstandakı səfirliyində tədbir təşkil olunub.
AZƏRTAC xəbər verir ki, tədbirdə Türkiyənin Yunanıstandakı səfiri Burak Özgergin və Afinada yaşayan soydaşlarımız iştirak ediblər.
Əvvəlcə Qarabağ müharibəsi şəhidlərinin əziz xatirəsi bir dəqiqəlik sükutla yad olunub.
Mərasimdə çıxış edənlər Azərbaycanın dövlətçilik tarixinin ən şanlı səhifələrindən biri olan 8 Noyabr - Zəfər Günü barədə məlumat veriblər.
Azərbaycanın Yunanıstan və Albaniyadakı səfiri Anar Hüseynov 30 ilə yaxın bir müddətdə aparılan danışıqlar prosesinin mahiyyətindən, bu istiqamətdə həyata keçirilən məqsədyönlü diplomatik fəaliyyətdən, müharibə vaxtı xalqımızın nümayiş etdirdiyi birlik və həmrəylikdən, döyüş meydanında şücaət göstərmiş qəhrəmanlardan, Azərbaycan-Türkiyə münasibətlərindən və Müzəffər Ali Baş Komandanın rəhbərliyi ilə qazanılmış möhtəşəm Zəfərdən bəhs edib. Qeyd olunub ki, 44 gün ərzində işğaldan azad edilən vətən torpaqlarına qaçqın və məcburi köçkünlərin geri qaytarılması üçün dövlət tərəfindən mühüm tədbirlər, vacib infrastruktur layihələri həyata keçirilir, bərpa və yenidənqurma işləri sayəsində Qarabağ abadlaşır.
Sonra çıxış edən Türkiyənin Yunanıstandakı səfiri Burak Özgergin Birinci Dünya müharibəsindən sonra Türkiyənin apardığı haqlı mübarizədən, ölkənin ərazi bütövlüyünün təmin olunması ilə bağlı görülmüş tədbirlər barədə geniş məlumat verib. Türkiyə dövləti və xalqının hər zaman Azərbaycan xalqının yanında olduğunu vurğulayan diplomat onların hər zaman “Bir millət, iki dövlət” prinsipinə əməl etdiklərini, müharibə zamanı Azərbaycanla bir olduqlarını bildirib. Əldə olunmuş Qələbə ilə regionda yeni əməkdaşlıq imkanın yarandığını vurğulayan səfir fəaliyyətə başlayacaq yeni nəqliyyat dəhlizinin imkanları, ölkələr arasında yaradılacaq iqtisadi fürsətdən və onun ticari əlaqələrin inkişafına göstərəcəyi müsbət təsir imkanlarından danışıb, ölkələr arasında əməkdaşlıq sahəsinin genişlənəcəyini qeyd edib. Sonda Zəfər günü münasibətilə öz səmimi təbriklərini ifadə edərək Qələbənin millətimizə yaraşdığını bildirib.
Sonra tədbir iştirakçılarına 44 günlük Vətən müharibəsinin tarixini, dövlətimizin başçısının çıxışlarını, Azərbaycan xalqının birlik və bərabərliyini və Türkiyə-Azərbaycan dostluğunu özündə ehtiva edən videomaterial nümayiş olunub. Tədbir Yunanıstanda yaşayan diaspor nümayəndəsinin milli musiqimizdən ibarət olan müxtəlif mahnı nümunələrin ifası ilə davam edib.
İqbal Hacıyev
AZƏRTAC-ın xüsusi müxbiri
Afina
Bölmənin digər xəbərləri
