Azərbaycanlı deputat Türkiyə mətbuatına Xocalı soyqırımı ilə bağlı müsahibə vermişdir
Bakı, 23 fevral (AZƏRTAC). Türkiyənin tanınmış “Hürriyet” qəzeti, “TRT” televiziya kanalı, “İhlas Haber” agentliyi və Türkiyənin bir sıra KİV-lərində Milli Məclisin deputatı Qənirə Paşayevanın Xocalı soyqırımı ilə bağlı müsahibələri yayımlanmışdır.
AZƏRTAC xəbər verir ki, “Hürriyet” qəzetində “Anladarkən ağladı” başlıqlı məqalədə Xocalı soyqırımının yalnız azərbaycanlılara deyil, bütün insanlığa qarşı edilmiş bir cinayət kimi dəyərləndirilmişdir. Deputat bildirmişdir ki, bu soyqırımı törədənlər ədalət qarşısında cavab verməlidirlər. Hər kəs Azərbaycanı bu mövzuda dəstəkləməlidir. Q.Paşayeva Xocalı soyqırımının təbliğatı istiqamətində konfransların keçirildiyini demişdir. Ermənistanın torpaqlarımızın 20 faizini işğal etdiyi, 1 milyon Azərbaycan türkünün öz ata-baba yurdlarından didərgin düşdüyü bildirilmiş, Ermənistanın beynəlxalq təşkilatların qərarlarına məhəl qoymadığı diqqətə çatdırılmışdır. Meksika parlamenti və Pakistan Senatının Xocalı soyqırımının tanınması barədə qərarlar qəbul etməsinin əhəmiyyəti vurğulanmışdır. Q.Paşayeva yaxın zamanda Xocalı soyqırımını tanıyan ölkələrin sayının artacağına ümidvar olduğunu bildirmişdir.
Bölmənin digər xəbərləri
