Azərbaycanlı gənclər ICESCO-nun gənc sülh elçisi seçiliblər
Bakı, 17 mart, AZƏRTAC
İslam Dünyası Təhsil, Elm və Mədəniyyət Təşkilatı (ICESCO) bazar ertəsi günü, martın 16-da Sülh və Təhlükəsizlik üzrə Liderlik Təliminin (LTIPS) dördüncü qrupunun bir hissəsi olaraq 42 ölkədən 3 min müraciət edən gənclərin arasından 47 gənc sülh elçisini seçib. AZƏRTAC təşkilatın məlumatına istinadla xəbər verir ki, onların arasında azərbaycanlı gənclər – Nərmin Seyid və Süleyman Zeynallı da var.
Beləliklə, ICESCO-nun gənc sülh elçilərinin ümumi sayı 227 nəfərə çatıb. Bu ikiillik təlim proqramı, əsasən, gənclərin liderliyinin gücləndirilməsinə və icmalarda müsbət dəyişikliklərin aparılmasının vacibliyi barədə məlumatlılığın artırılmasına yönəlmiş 10 təlim modulu vasitəsilə sülhü təşviq etməyi hədəfləyir. Proqram geniş miqyasda liderləri, ekspertləri və mütəxəssisləri əhatə etməklə yanaşı, gənclərin və qadınların davamlı inkişaf və sülh sahəsindəki potensialını artırmaq, sosial birliyi və birgəyaşayışı təşviq etmək üçün əvvəlki qruplardan olan gənc sülh səfirləri şəbəkəsi ilə əlaqələri gücləndirir.
Əvvəlki nəşrləri 87 gənclik layihəsi və yüzlərlə fəaliyyətlə nəticələnən ICESCO-nun Sülh və Təhlükəsizlik üzrə Liderlik Təlimi bu təşkilatın “360° Sülh” yanaşmasının bir hissəsini təşkil edir. Bu proqram hərtərəfli, çoxsahəli çərçivə əsasında əsas inkişaf sahələrini əhatə etməklə, habelə sülh, dialoq və vətəndaşlıq dəyərlərini inkişaf etdirməyə yönəlmiş yüzlərlə təşəbbüs həyata keçirməklə davamlı sülhü təşviq etməyə istiqamətlənib.
Bölmənin digər xəbərləri
