AZƏRTAC-ın xüsusi müxbiri 24news.ge internet televiziyasında aparılan müzakirələrdə iştirak edib
Tbilisi, 4 mart, AZƏRTAC
Gürcüstanın 24news.ge internet televiziyasında yayımlanan “Sərbəst müzakirə” adlı verilişdə Prezident Salome Zurabişvilinin Azərbaycana səfərinin nəticələri müzakirə olunub. Gürcüstan parlamentinin deputatları ilə yanaşı, müzakirələrdə AZƏRTAC-ın bu ölkədəki xüsusi müxbiri Xətayi Əzizov da iştirak edib.
X.Əzizov Azərbaycan ilə Gürcüstan arasındakı qədim dostluq əlaqələrinin tarixinə nəzər salıb, iki dövlətin münasibətlərinin strateji tərəfdaşlıq səviyyəsinə yüksəldiyini vurğulayıb. Bildirilib ki, Gürcüstanın yeni prezidentinin regionda ilk səfərini Azərbaycana etməsi dostluğumuzun bariz nümunəsidir. S.Zurabişvilinin Azərbaycanda Prezident İlham Əliyev, Birinci vitse-prezident Mehriban Əliyeva, Baş nazir Novruz Məmmədov, Milli Məclisin sədri Oqtay Əsədovla görüşlərində müzakirə olunan məsələlər, səslənən fikirlər də bunu bir daha sübut etdi.
Xüsusi müxbir Azərbaycanın və Gürcüstanın birgə iştirakı ilə həyata keçirilən irimiqyaslı enerji, nəqliyyat və logistik layihələrin təkcə bu iki xalqın deyil, regionun və Avropanın inkişafındakı rolundan da danışıb. Bildirib ki, Prezident Salome Zurabişvilinin səfəri iki ölkə arasında əlaqələrin yeni müstəvidə inkişafına təkan verəcək, münasibətlərimiz daha da genişlənəcək və inkişaf edəcək. Qeyd edib ki, bütün bunlara baxmayaraq, bəzi qüvvələr Azərbaycan və gürcü xalqlarının dostluğuna xələl gətirməyə, münasibətləri pozmağa çalışıblar. Lakin onlar buna nail ola bilməyəcəklər.
Bölmənin digər xəbərləri
