BAEA NÜMAYƏNDƏLƏRİ İRANIN NÜVƏ OBYEKTLƏRİNİ YOXLAYIRLAR
Missiyanın başlıca vəzifəsi İranda uranın saflaşdırılması üzrə işlər aparılmadığını yəqin etməkdir. Bu, son vaxtlar artıq ikinci inspeksiyadır. Əvvəlki inspeksiya oktyabrın axırlarında keçirilmişdi.
Yoxlama noyabrın 23-dək davam edəcək və BAEA Müdirlər Şurasının növbəti sessiyası ərəfəsində başa çatacaqdır. Sessiyada İran məsələsinə baxılacaqdır.
İranın nüvə obyektlərində “qəfil yoxlamalar” nüvə silahının yayılmaması haqqında Müqaviləyə əlavə protokol əsasında keçirilir. İran bu sənədi imzalasa da, parlament hələlik onu ratifikasiya etməmişdir. Buna baxmayaraq, BAEA nümayəndələri İslam Respublikasının nüvə obyektlərinə sərbəst gedə bilirlər. Yerli KİV-lərin məlumatına görə, onlar bu obyektlərdə ümumən 1400 adam-gün keçirmişlər. Tehranın fikrincə, bu fakt İranın BAEA ilə açıq əməkdaşlığına və onun nüvə proqramının şəffaflığına inandırıcı sübutdur.
Beynəlxalq inspektorlar İranda aparılan nüvə tədqiqatlarının hərbi xarakterinə dair indiyədək heç bir əlamət aşkar etməmişlər.
Bölmənin digər xəbərləri
