“Bahadur Nəcəfov- xatirələrdə yaşayan ziyalı” kitabının təqdimatı keçirilmişdir
Bakı, 2 noyabr (AZƏRTAC). Noyabrın 2-də Beynəlxalq Mətbuat Mərkəzində pedaqoq, tanınmış ziyalı Bahadur Nəcəfovun anadan olmasının 80 illiyi və ona həsr edilmiş “Bahadur Nəcəfov - xatirələrdə yaşayan ziyalı” kitabının təqdimatı olmuşdur.
AZƏRTAC xəbər verir ki, tədbirdə şair İlyas Tapdıq yaxın dostu və tələbəlik yoldaşı B.Nəcəfov haqqında xatirələrini bölüşmüşdür. Onun vətənpərvər ziyalı, qayğıkeş pedaqoq və gözəl insan kimi müsbət xüsusiyyətlərindən danışan şair, Bahadur Nəcəfov irsinin araşdırılmasının, dərsliklərə salınmasının vacib olduğunu söyləmişdir.
Çıxış edənlər Bahadur Nəcəfovun kitabın birinci hissəsində yer etmiş “Şifahi nitqlə yazılı nitqin qarşılıqlı təsirində texniki vasitələrin rolu”, “Leksik və üslubi təhlilin nitq inkişafına təsiri”, “Fonetik təhlilin nitq inkişafına təsiri” və s. sərlövhəli yazılarını Azərbaycan dilinin müəyyən normalarının aydın, yığcam, lakonik şəkildə izah edilməsi baxımından yüksək qiymətləndirmişlər.
Tədbirdə B.Nəcəfovun həyat və fəaliyyətini əks etdirən videoçarx nümayiş etdirilmişdir.
Sonda kitabın tərtibatçısı, Bahadur Nəcəfovun oğlu Xalid Nəcəfov tədbirin təşkilatçılarına və iştirakçılarına minnətdarlığını bildirmişdir.
Bölmənin digər xəbərləri
