Bakı Modern Məktəbində nar bayramı keçirilmişdir
Bakı, 3 noyabr (AZƏRTAC). Artıq səkkizinci ildir ki, Göyçay rayonunda ənənəvi nar bayramı keçirilir. Bu bayramda rəsmi şəxslər, xarici qonaqlar, ictimaiyyətin nümayəndələri iştirak edirlər.
Səkkizinci nar bayramını Bakı Modern Məktəbinin şagirdləri də özünəməxsus şəkildə qeyd etmişlər. Şagirdlər nar haqqında əldə etdikləri maraqlı elmi məlumatlardan toplu hazırlamış, həmin məlumatları divar qəzeti şəklinə salıb nümayiş etdirmişlər. Şagirdlər kiçik elektron təqdimatlar da hazırlayaraq narın çoxşaxəli faydası, el təbabətində istifadəsi haqqında məlumat vermişlər.
Nar bayramı ərəfəsində şagirdlər yaradıcı fəaliyyətə də geniş yer ayırmışlar. Onlar “Aldım bir dənə, açdım min dənə” adlı rəsm müsabiqəsində həvəslə iştirak etmişlər. Müsabiqənin sonunda şagirdlərin əl işlərindən ibarət məktəbdaxili kiçik sərgi təşkil edilmişdir.
Bakı Modern Məktəbinin şagirdləri narın insan orqanizmi üçün nə qədər faydalı olması haqqında məlumat toplamaqla yanaşı, Azərbaycanın gözəl guşələrindən olan Göyçay rayonu ilə bağlı da ətraflı bilik əldə etmişlər.
Bölmənin digər xəbərləri
