Bakı Uşaq və Gənclər Teatrında bu ay iki premyera nəzərdə tutulub
Bakı, 7 yanvar, AZƏRTAC
Bakı Uşaq və Gənclər Teatrı 2026-cı ildə bir neçə yeni səhnə əsəri ilə tamaşaçıların görüşünə gəlməyi planlaşdırır.
Teatrın ədəbi dram hissə müdiri Leyla Həşimovanın AZƏRTAC-a verdiyi məlumata görə, yanvar ayında iki premyera nəzərdə tutulub.
“Dovşanın evi” tamaşasına (müəllif Arzu Soltan) Əməkdar artist İntiqam Soltan quruluş verib. "Zaman maşını" (müəllif Aygün Həsənoğlu) tamaşasının rejissorları isə Mehman Piriyev və Rauf Hüseynlidir.
Teatrda, həmçinin "Atan ruslardır" (müəllif və rejissor İntiqam Soltan), "Axirətdən gələn zəng" (müəllif Hüseynbala Mirələmov, rejissor Əməkdar incəsənət xadimi Ağalar İdrisoğlu), "Pişiklər və şirlər" (müəllif və rejissor İlhamə Əhmədova) tamaşaları hazırlanır.
Bir neçə il öncə Bakı Uşaq və Gənclər Teatrında hazırlanan, narkomaniyaya qarşı mübarizəyə həsr olunmuş "Həyatla oyun" (müəllif Arzu Soltan, rejissor İntiqam Soltan) tamaşası da yenidən səhnəyə qayıdacaq.
Teatrın şanlı Zəfərimizin 5 illiyi münasibətilə başlatdığı “Addım-addım Vətəndə” layihəsi bu il də davam edəcək. Kollektiv ötən il bu layihə çərçivəsində bölgələrdə fəaliyyət göstərən teatrlarla birgə tamaşa nümayişləri və tədbirlər təşkil edib. Layihəyə Bakıda bölgə teatrlarının iştirak edəcəyi festivalla yekun vurulması nəzərdə tutulur.
Bölmənin digər xəbərləri
