BAKIDA AÇILACAQ BEYNƏLXALQ SƏRGİLƏRƏ HƏSR OLUNMUŞ MƏTBUAT KONFRANSI KEÇİRİLMİŞDİR
AZƏRTAC xəbər verir ki, sentyabrın 23-də Heydər Əliyev adına İdman-Konsert Kompleksində Bakıda açılacaq ”Bihe-2008” 14-cü beynəlxalq səhiyyə və “Stomatology-2008” 3-cü beynəlxalq stomatologiya sərgilərinə həsr olunmuş mətbuat konfransı keçirilmişdir.
“İteca Caspian” LLC şirkətinin direktoru Fərid Məmmədov bildirmişdir ki, oktyabrın 24-dən beynəlxalq sərgilər öz işinə başlayacaqdır.
Bildirilmişdir ki, 14 ildir ənənəvi olaraq təşkil edilən “Bihe” sərgisi Azərbaycanın səhiyyə sahəsinin inkişafına öz töhfəsini vermişdir. Sərginin məqsədi ölkəmizdə tibb sahəsində çalışan mütəxəssislərlə təcrübə mübadiləsi aparmaq, müasir texnologiya və avadanlıqla tanış olmaq imkanı yaratmaqdır.
Səhiyyə sərgisinin meneceri Nigar Qədirova sərgilər haqqında məlumat verərək bildirmişdir ki, burada dünyanın 19 ölkəsindən 100 şirkət iştirak edəcəkdir. Şirkətlər məhsul və xidmətlərini farmakologiya, tibbi avadanlıq və materiallar, optika və oftalmologiya, diaqnostika cihazları, ortopediya və reabilitasiya, tibb sahəsində informasiya texnologiyaları və digər bölmələr üzrə təqdim edəcəklər.
Üçüncü stomatologiya sərgisində bu sahədə əldə olunmuş ən son naliyyətlər nümayiş olunacaqdır.
Ölkəmizdə ilk dəfə təşkil olunacaq gözəllik sərgisində isə plastik cərrahiyyə və gözəllik salonları üçün avadanlıq, müxtəlif məhsullar təqdim olunacaqdır.
Bildirilmişdir ki, sərgilərdə ilk dəfə iştirak edəcək xarici şirkətlərin sayı çoxdur. Ölkəmizi 40-dan çox şirkət təmsil edəcəkdir.
Xatırladaq ki, 3 gün davam edəcək sərgi Azərbaycan Səhiyyə Nazirliyi, Ticarət və Sənaye Palatası, Azərbaycanda İxracın və İnvestisiyaların Təşviqi Fondu və Azərbaycan Stomatoloji Assosiasiyasının rəsmi dəstəyi ilə keçiriləcəkdir.
Bölmənin digər xəbərləri
